"Baseten" 13 milyard dollar dəyərləndirmə ilə 1,5 milyard dollar investisiya cəlb edir

Süni intellekt inferensiyası sahəsində fəaliyyət göstərən "Baseten" şirkəti 13 milyard dollar dəyərləndirmə ilə 1,5 milyard dollarlıq yeni maliyyələşdirmə raundunu yekunlaşdırmağa yaxındır.

Valyuta.az xəbər verir ki,  bu barədə "The Wall Street Journal" məlumat yayıb.

Cəmi beş ay əvvəl startap 5 milyard dollar dəyərləndirmə ilə 300 milyon dollarlıq E seriyası investisiya raundunu bağladığını açıqlamışdı.

Həmin raund isə 150 milyon dollarlıq D seriyası investisiyanın cəlb edilməsindən cəmi doqquz ay sonra baş tutmuşdu.

Əgər yeni maliyyələşdirmə rəsmiləşərsə, bu, şirkətin dəyərinin yarım ildən az müddətdə təxminən 160 faiz artması demək olacaq.

Bununla belə, "The Wall Street Journal" bildirir ki, bu, bölünmüş qiymətləndirmə modelinə əsaslanan investisiya raundudur. Startaplar son dövrlərdə bu üsuldan istifadə edərək rəsmi dəyərləndirmələrini daha yüksək göstərməyə və aparıcı investorların göstəricilərini kağız üzərində daha cəlbedici etməyə çalışırlar.

Məlumata görə, yeni raundda bəzi investorlar şirkətə 13 milyard dollar, digərləri isə 11 milyard dollar dəyərləndirmə ilə sərmayə qoyurlar. Mənbələrin sözlərinə görə, sövdələşməyə "Spark Capital", "Sands Capital", "Altimeter Capital" və "Wellington Management" birgə rəhbərlik edir.

2019-cu ildə fəaliyyətə başlayan "Baseten", "The Next Wave" tərəfindən “inferensiya qızıl hərisliyi” adlandırılan tendensiyadan faydalanan şirkətlərdən biridir.

Bu tendensiya çərçivəsində vençur investorları inferensiya qatını quran şirkətlərə böyük həcmdə vəsait yatırırlar.

İnferensiya istifadəçinin sorğu (prompt) təqdim etməsindən sonra modelin həyata keçirdiyi hesablama prosesidir.

"Baseten" müraciətləri konkret tapşırıq üçün ən uyğun modelə yönləndirərək, xüsusilə də daha sərfəli və güclü açıq mənbəli alternativlərdən istifadə etməklə inferensiya prosesini sürətli və qənaətli şəkildə həyata keçirməyi vəd edir.

Tənzilə Ağabalayeva