"Bitcoin"dəki enişi əvvəlcədən bilən analitik: "50 min dollar böyük alış fürsəti olacaq"

"Bitcoin" son bir ayda əsasən üfüqi hərəkət etsə də, "Fundstrat" şirkətinin idarəedici direktoru Şon Farrell (Sean Farrell) hesab edir ki, kriptovalyutalar yenidən risk-gəlirlilik baxımından səhmlərdən daha cəlbedici olmağa başlayıb.

Valyuta.az xəbər verir ki, "CoinAge" nəşrinə danışan Farrell bildirib ki, "Bitcoin" 50 min dollar səviyyəsinə yaxınlaşarsa, bu, uzunmüddətli investorlar üçün böyük alış imkanı olacaq.

"Bitcoin 50 min dolların bir qədər üzərinə düşərsə, ciddi alış edərəm. Bunun investorlar üçün böyük fürsət olacağını düşünürəm", - deyə analitik bildirib.

Farrell orta və uzunmüddətli perspektivdə "Bitcoin"ə nikbin yanaşsa da, qısamüddətli dövr üçün ehtiyatlı mövqe sərgiləyir. Onun sözlərinə görə, faiz artımı gözləntiləri, yüksək real gəlirlər və Yaxın Şərqdəki geosiyasi gərginlik likvidlikdən asılı aktivlərə təzyiq göstərir.

Analitik həmçinin bildirib ki, "Strategy" şirkətinin gələcəkdə "Bitcoin" satmaq məcburiyyətində qala biləcəyi ilə bağlı risk tam aradan qalxmasa da, bir neçə həftə əvvəl gözlənilən nəzarətsiz satış təhlükəsi artıq əhəmiyyətli dərəcədə azalıb.

Farrellin proqnozlarını önəmli edən məqamlardan biri isə onun əvvəlki təxminlərinin böyük ölçüdə doğrulmasıdır. O, 2025-ci ilin dekabrında "Bitcoin"in 60-65 min dollar aralığına enəcəyini proqnozlaşdırdı. Sonradan "Bitcoin" 60 min dollara, "Ethereum" 1 747 dollara, "Solana" isə 67,5 dollara qədər gerilədi. İyulun əvvəlində isə "Bitcoin" 58 min dollardan da aşağı düşərək analitikin proqnozlaşdırdığı intervalın alt sərhədini test edib.

Sərvanə Rəmixanova