Kripto bazarının yaxından izlədiyi şirkət 70 milyon dollarlıq "Bitcoin" satdı

Kriptovalyuta investisiyaları və aktivlərin idarə olunması sahəsində fəaliyyət göstərən "Abraxas Capital" da "Bitcoin" satışına başlayan iri şirkətlər sırasına qoşulub.

Valyuta.az xəbər verir ki, şirkət təxminən 70 milyon dollar dəyərində 1000 ədəd "Bitcoin" (BTC) satıb. Bununla yanaşı, "Abraxas Capital"ın mərhələli şəkildə USDT və USDC çıxarışları etdiyi də bildirilir.

"EmberCN"in paylaşdığı məlumata görə, "Abraxas Capital" satdığı "Bitcoin"ləri "Kraken" kriptobirjasına köçürüb. Daha sonra şirkət USDT və USDC şəklində ümumilikdə 52,7 milyon dollar vəsaiti mərhələli şəkildə çıxarıb.

Mərkəzi ofisi Londonda yerləşən "Abraxas Capital" ötən il böyük həcmdə "Ether" (ETH) alışları ilə də diqqət çəkib. Məlumatlara görə, şirkət mərhələli şəkildə 270 mindən çox "ETH" əldə edib. Bu səbəbdən bəzi analitiklər onu "Ether balinası" adlandırmağa başlayıblar.

Qeyd edək ki, "Abraxas Capital" bu ilin aprel ayında da "Tether" şirkətindən 2,89 milyard dollar həcmində USDT çıxarışı həyata keçirib. Şirkət hazırda "Tether"in ən böyük korporativ müştərilərindən biri hesab olunur.

Sərvanə Rəmixanova