"Lovable" "Google Cloud" ilə çoxillik müqavilə imzalayıb

"Lovable" və "Google" çərşənbə günü genişləndirilmiş çoxillik əməkdaşlıq barədə elan veriblər. Stokholmda yerləşən və sürətlə böyüyən vibe-coding startapı olan "Lovable" uzun müddətdir "Google Cloud" xidmətlərinin istifadəçisidir. Yeni razılaşmaya əsasən isə şirkətin istifadəsi əhəmiyyətli dərəcədə artacaq.

Valyuta.az xəbər verir ki, tərəflər müqavilənin maliyyə dəyərini açıqlamasalar da, razılaşmadan məlumatlı bir şəxs bildirib ki, müqavilə "Lovable"ın "Google Cloud" üzərindəki fəaliyyətinin, o cümlədən süni intellekt istifadəsinin beş dəfə artırılmasını nəzərdə tutur.

Həmin mənbənin sözlərinə görə, razılaşma çərçivəsində "Lovable" həm kodlaşdırma tapşırıqları üçün geniş istifadə olunan "Anthropic" şirkətinin "Claude" modeli, həm də "Google"un özünün "Gemini" modellərinə daha geniş çıxış əldə edəcək.

Xüsusilə "Anthropic"lə bağlı hissə diqqət çəkir. "Google" aprel ayında "Anthropic"ə 10 milyard ABŞ dolları həcmində nağd və hesablama kreditləri şəklində investisiya yatırıb və şirkət müəyyən göstəricilərə nail olacağı təqdirdə əlavə 30 milyard dollar ayıracağını vəd edib. Bu investisiya "Anthropic"in 350 milyard dollar dəyərində qiymətləndirildiyi vaxt həyata keçirilib. Bundan cəmi bir ay sonra isə şirkət onu təxminən 1 trilyon dollar dəyərində qiymətləndirən möhtəşəm 65 milyard dollarlıq investisiya raundu cəlb edib.

Bu razılaşma "Anthropic"in həmin hədəflərə çatmasına kömək edə bilər. Çünki "Lovable" Avropanın tarixdə ən sürətlə böyüyən startaplarından biri hesab olunur. Şirkətin məlumatına görə, o, fevral ayında illik hesablanmış gəlirini 400 milyon dollar səviyyəsini keçirməyə nail olub. Bunun 100 milyon dolları cəmi bir ay ərzində əldə olunub və şirkətdə yalnız 146 əməkdaş çalışır. "Lovable" həmçinin bildirir ki, "Fortune 500" siyahısındakı şirkətlərin yarıdan çoxu onun məhsullarından bu və ya digər formada istifadə edir.

Razılaşma "Lovable"ı "Google" ekosisteminin digər hissələrinə də inteqrasiya edir. Şirkətin yeni agenti "Google Cloud"un korporativ agentlər bazarı olan "Gemini Enterprise Agent Gallery" vasitəsilə əlçatan olacaq. Tərəflər bu əməkdaşlığın siqnallarını ilk dəfə aprel ayında ABŞ-də keçirilən böyük "Google Cloud" konfransında vermişdilər.

Həm insanların, həm də süni intellekt agentlərinin yazdığı kodun təhlükəsizliyini artırmaq məqsədilə "Lovable" həmçinin "Wiz" platforması ilə inteqrasiya olunacaq. "Wiz" "Google"un 32 milyard dollar dəyərində ən böyük satınalması olub və sövdələşmə elan edildikdən bir il sonra, bu ilin mart ayında rəsmi şəkildə tamamlanıb. Yeni inteqrasiya "Wiz"ə təhlükəsizlik problemlərini real vaxt rejimində müəyyənləşdirmək və aradan qaldırmaq imkanı verəcək.

"Lovable" agentlərinin "Google"un bazarı vasitəsilə satışa çıxarılması nəticəsində korporativ satınalma və hesablaşma prosesləri sadələşdiriləcək. Bu da şirkətin daha çox korporativ müştəri cəlb etməsini asanlaşdıracaq.

"Google" üçün hesab sadədir. Əgər şirkət həm "Lovable", həm də "Anthropic"in inkişafını maliyyə imkanları geniş olan korporativ müştərilər vasitəsilə sürətləndirə bilsə, əldə olunan gəlirlər bu il planlaşdırılan 180–190 milyard dollarlıq kapital xərclərinin maliyyələşdirilməsinə kömək edəcək. Şirkət artıq bu xərclərin bir hissəsini qarşılamaq üçün rekord həcmdə — 85 milyard dollar dəyərində səhmlərin satışını həyata keçirir. Beləliklə, qarşılanmalı məbləğin təxminən daha 100 milyard dolları qalır.

Tənzilə Ağabalayeva