Şikayət indeksində hər ay ilk beşlikdə yer alan bank

Mərkəzi Bankın metodologiyasına görə, şikayət indeksi bankın xidmətlərindən istifadə edən müştərilərin sayı nəzərə alınmaqla hesablanır. İndeks bank üzrə Mərkəzi Banka daxil olan şikayətlərin payının həmin bankın müştərilər üzrə bazar payına nisbəti əsasında formalaşdırılır.

Valyuta.az Azərbaycan Mərkəzi Bankının açıqladığı "Bank müştərilərinin bank xidmətlərindən istifadəsi üzrə şikayət indeksi" məlumatlarına əsasən xəbər verir ki, 2026-cı ilin ilk yarısında (yanvar-iyun ayları) Unibank şikayət indeksində bütün aylarda ilk beşlikdə yer alıb.

Qeyd edək ki, hesablamalarda yalnız Mərkəzi Banka daxil olmuş şifahi, yazılı və vətəndaş qəbulu zamanı qəbul edilən şikayətlər nəzərə alınır. Təkrar şikayətlər, kredit üzrə güzəştlərin verilməsi və ya kredit ayrılması ilə bağlı müraciətlər, eləcə də Mərkəzi Bankın səlahiyyətlərinə aid olmayan digər mövzular hesablamadan kənarda saxlanılır.

Müştərilər üzrə bazar payı cari hesabında 100 manat və daha çox qalığı olan, həmçinin son üç ay ərzində ən azı bir bank əməliyyatı həyata keçirmiş müştərilərin sayı əsasında müəyyən edilir.

Beləliklə, şikayət indeksi bankın bazardakı müştəri sayını nəzərə almaqla, Mərkəzi Banka daxil olan şikayətlərin proporsionallığını əks etdirən göstəricidir.

Mayya Hüseynova