"Aktiv olmayan rəqəmsal ödəniş platforması əlavə xərc yaradır" - Ekspert izah edir

Qeyri-aktiv hesablardan aylıq 5 manat xidmət haqqının tutulması "m10"a nə qazandırır?

Bank məsələləri üzrə ekspert Əkrəm Həsənov Valyuta.az-a bildirib ki, banklarla rəqəmsal ödəniş platformaları arasında ciddi fərq var:

"Banklar müştərilərin hesablarda saxladıqları vəsaitdən maliyyə resursu kimi istifadə edir, həmin vəsait hesabına kreditlər verir. Bundan əlavə, Mərkəzi Bankın banklar üçün kapital, aktivlər və digər prudensial göstəricilərlə bağlı çoxsaylı tələbləri mövcuddur. Hesablardakı vəsait bankların fəaliyyətində mühüm rol oynayır və bəzi hallarda həmin vəsait üzrə gəlir də əldə edilir.

Rəqəmsal ödəniş platformalarının fəaliyyət modeli isə fərqlidir. Onların əsas gəliri kreditləşmədən formalaşmır. Hesabda qalan vəsaitdən kredit vermək üçün istifadə edə bilmədiklərinə görə, həmin vəsait platformaya birbaşa gəlir qazandırmır. Əksinə, bu vəsaitin uçotu, saxlanılması və idarə olunması müəyyən inzibati və əməliyyat xərcləri yaradır. Aylıq 5 manat xidmət haqqının çox və ya az olması barədə konkret qiymət vermək çətindir. Burada əsas məsələ məbləğdən çox prinsipdir. Qeyri-aktiv hesabın saxlanılması platforma üçün müəyyən yük yaradır və bu vəsait platformaya əlavə gəlir gətirmir. Əgər bu şərt istifadəçi ilə bağlanmış müqavilədə əvvəlcədən nəzərdə tutulubsa, platforma həmin xidmət haqqını tuta bilər. İstifadəçi bu şərtlərlə razı deyilsə, hesabındakı vəsaiti çıxarmaq hüququna malikdir".

Mayya Hüseynova