Sinqapurun Fintex nəhəngi ayFAST regional sərvət mühərrikinə necə çevrildi?

​Fintex sözü hələ gündəlik həyatımıza daxil olmamışdan çox əvvəl, Lim Çunq Çun Sinqapurda pərakəndə investorları onlayn dünyaya daşıyırdı. Onun hekayəsi 1998-ci ildə, dotkom bumunun ən pik nöqtəsində başladı. O zaman "Aym-En-Ci Barinqs Sekyuritiz" şirkətindəki tədqiqat şöbəsinin rəhbəri vəzifəsindən ayrılan Lim, iki il sonra onlayn qarşılıqlı fondların alqı-satqısını asanlaşdıran “Fundsupermart.com” platformasını yaratdı. Digər fintex layihələrinin yalnız investisiya və ya yalnız bankçılığa yönəldiyi bir dövrdə Lim hər ikisini birləşdirmək qərarına gəldi və 2003-cü ildə ayFAST şirkətini qurdu.

​Bu gün həmin ilk layihə artıq “Ef-Es-Em Qlobal” adı altında Cənub-Şərqi Asiyanın ən böyük sərvət idarəetmə saytlarından birinə çevrilib. Hazırda platformanın 1,2 milyon müştəri hesabı var və burada 29 minə yaxın fərqli investisiya məhsulu təqdim olunur. Şirkət öz fəaliyyətini yalnız qarşılıqlı fondlarla məhdudlaşdırmayıb; istiqrazlar, səhmlər və birja fondları vasitəsilə Malayziya, Honkonq, Çin, Böyük Britaniya və Amerika Birləşmiş Ştatları bazarlarına qədər genişlənib. İdarəetmədə olan 33 milyard Sinqapur dolları həcmindəki aktivlərin böyük hissəsi məhz biznes tərəfdaşlarına göstərilən xidmətlərin payına düşür və bu sistem 14 700 sərvət məsləhətçisinə xidmət edir.

Əsas hədəf

​İndi 58 yaşlı Lim Çunq Çunun əsas hədəfi Böyük Britaniyadakı rəqəmsal bankları olan ayFAST Qlobal Bankı, yəni qısaca “iGB” platformasını mövcud investisiya sisteminə inteqrasiya etməkdir. Limin əsas hədəf kütləsi var-dövləti bir milyon dollara qədər olan kütləvi varlı təbəqədir. O qeyd edir ki, böyük özəl banklar əsasən ultra-zəngin şəxslərə xidmət göstərdiyi halda, bu orta zəngin təbəqə böyük bir boşluq və fürsət yaradır. Şirkətin məqsədi 2030-cu ilə qədər idarə olunan aktivlərin həcmini 100 milyard Sinqapur dollarına çatdırmaqdır.

​Bu hədəfə çatmaq üçün şirkət sərhədlərarası pul köçürmələrini asanlaşdırmağa çalışır. Artıq Malayziyada ödəniş lisenziyası üçün ilkin razılıq alınıb. Həmçinin “iGB” Çinin texnologiya nəhəngi Ant Qrupun beynəlxalq qolu olan Alipey sistemi ilə tərəfdaşlıq qurub. Bu əməkdaşlıq sayəsində müştərilər dünya üzrə 100-dən çox bazarda fəaliyyət göstərən 150 milyondan çox ticarət nöqtəsində birbaşa bank tətbiqi vasitəsilə ödəniş edə biləcəklər.

Bəs Lim Çunq Çun kimdir?

​Lim Çunq Çun əslində Malayziyanın kiçik bir qəsəbəsində, foto-studiya işlədən bir ailədə böyüyüb. Valideynləri onun həkim olmasını istəsələr də, tale onu Sinqapur Milli Universitetinin elektrik mühəndisliyi ixtisasına və daha sonra maliyyə analitiki sahəsinə yönəldib. 1998-ci ildə işindən ayrılan Lim, dostu Moh Hon Menq ilə birlikdə onlayn investisiya dünyasının gələcəyinə inanaraq ailə və dostlarından topladıqları 500 min Sinqapur dolları ilə ilk addımlarını atıblar.

​ayFAST-ın uğurunun əsas sirlərindən biri hələ başlanğıcda qəbul edilmiş strateji qərardır. Lim, proqram təminatını kənar şirkətlərdən almaq əvəzinə, öz daxili İT komandasını qurmağa üstünlük verdi. O, xarici texnologiyalardan asılılığın inkişafı məhdudlaşdıracağını yaxşı anlayırdı.

Digər rəqiblər yalnız kiçik və spesifik xidmətlər təklif etdiyi halda, ayFAST müştərilərinə eyni platformada həm nağd pul saxlamaq, həm sərhədlərarası köçürmə etmək, həm də qlobal bazarlara investisiya yatırmaq imkanı verən universal bir sistem təqdim edir.

​Qlobal lisenziya maneələrini aşmaq üçün isə şirkət fərqli bir yol seçdi. Sinqapur və Honkonqda rəqəmsal bank lisenziyası ala bilməyən Lim, yönünü Böyük Britaniyaya çevirdi. 2022-ci ildə Londonda yerləşən Bi-Ef-Si Bankı satın alaraq adını ayFAST Qlobal Bank etdi və rəqəmsal sistemini öz texnologiyası ilə yenidən qurdu. Şirkətin maliyyə göstəriciləri də olduqca təsiredicidir. 2024-cü ildə xalis mənfəət iki dəfədən çox artaraq 67 milyon Sinqapur dollarına çatıb və bu uğur şirkətə Forbs siyahısında yer qazandırıb. 2025-ci ildə isə mənfəət 100 milyon Sinqapur dollarını ötüb. Lim, ayFAST-ın təxminən 20 faizlik payına sahib olan ən böyük fərdi səhmdarıdır və bu payın dəyəri 540 milyon Sinqapur dollarıdır.

Şəbnəm İbrahimxəlilova