"Switch" 80 milyard dollarlıq dəyərləndirmə ilə IPO-ya hazırlaşır

ABŞ-ın məlumat mərkəzləri operatoru "Switch" cari ilin dördüncü rübündə keçirilə biləcək ilkin kütləvi səhm təklifi (IPO) üçün investisiya banklarını seçib.

Valyuta.az xəbər verir ki, şirkətin IPO vasitəsilə 10 milyard dollara qədər vəsait cəlb edəcəyi, bazar dəyərinin isə borclar da daxil olmaqla 80 milyard dollara çata biləcəyi bildirilir.

IPO-nun aparıcı anderrayterləri kimi "Goldman Sachs" və "JPMorgan Chase" seçilib. Hazırda təklifin həcmi, keçirilmə vaxtı və yekun dəyərləndirmə ilə bağlı müzakirələr davam edir.

"Switch"in IPO-su son illərdə ABŞ fond bazarında həyata keçirilən ən iri ilkin kütləvi təkliflərdən biri ola bilər. Bu, investorların süni intellekt infrastrukturuna xidmət göstərən şirkətlərə marağının artdığını göstərir.

Məlumata görə, ABŞ-da bu ilin əvvəlindən IPO-lar vasitəsilə 155,5 milyard dollar vəsait cəlb olunub. Bu göstərici 2021-ci ildən bəri ən yüksək səviyyə hesab edilir.

Həmçinin "Switch" süni intellekt hesablamaları üçün tələb olunan enerji təchizatı, soyutma və yüksək sürətli bağlantı imkanları təqdim edən iri məlumat mərkəzləri şəbəkəsini idarə edir. Şirkətin infrastrukturundan bulud xidmətləri provayderləri və müəssisələr yüksək enerji sərf edən GPU klasterlərinin yerləşdirilməsi və AI modellərinin öyrədilməsi üçün istifadə edirlər.

Şirkətin müştəriləri sırasında "Nvidia", "Dell Technologies" və "FedEx" yer alır.

Qeyd edək ki, baş ofisi Las-Veqasda yerləşən "Switch" 2000-ci ildə Rob Roy tərəfindən təsis edilib. Şirkət 2022-ci ildə "DigitalBridge" və "IFM Investors" tərəfindən 11 milyard dollara özəlləşdirilib. 2016-cı ildən etibarən isə bütün məlumat mərkəzlərini bərpa olunan enerji ilə təmin edir.

Rəfiqə Abdin