Hansı bankların səhmdarları fiziki şəxslərdir?

Azərbaycanda fəaliyyət göstərən bankların əksəriyyətində ən böyük səhmdarlar hüquqi şəxslərdir. Bunlara dövlət qurumları, holdinqlər, xarici banklar və digər şirkətlər daxildir. Bununla yanaşı, bir sıra banklarda nəzarət paketi fiziki şəxslərin əlində cəmləşib.

Valyuta.az bankların səhmdar strukturu ilə bağlı məlumatları təqdim edir.

"Bank VTB", "Ziraat Bank Azərbaycan", "Kapital Bank", "Yapı Kredi Bank Azərbaycan", "ABB", "PAŞA Bank", "Azər Türk Bank", "Xalq Bank", "Bank Avrasiya", "Expressbank", "Bank of Baku" və "AccessBank"ın ən böyük səhmdarları hüquqi şəxslərdir.

Bunun əksinə olaraq, "AFB Bank", "Yelo Bank", "Unibank", "Premium Bank", "Bank Respublika" və "Rabitəbank"da ən böyük paya malik səhmdarlar fiziki şəxslərdir.

Fiziki şəxslər arasında ən yüksək pay "AFB Bank"ın əsas səhmdarı Hikmət İsmayılova məxsusdur. O, bankın 99,64% səhminə sahibdir. Ondan sonra "Yelo Bank"ın əsas səhmdarı Marina Kulişova (98,94%) və "Unibank"ın əsas səhmdarı Eldar Qəribov (94,08%) qərarlaşıb.

Beləliklə, bank sektorunda ən böyük səhmdar kimi daha çox hüquqi şəxslər təmsil olunsa da, altı bankda nəzarət paketi fiziki şəxslərin əlində cəmləşib. 

Mayya Hüseynova