Klassik və nadir 5 "Disney" kolleksiya əşyası minlərlə dollara satılır

1923-cü ildən bəri "Disney" bütün dünya üçün ən yaddaqalan filmlər, obrazlar və təcrübələr yaradır. Bu isə o deməkdir ki, son 100 ildən artıq müddətdə toplanmış çoxsaylı xatirə əşyaları bu gün yaxşı gəlir mənbəyinə çevrilə bilər — əgər onları tapa bilsəniz.

Valyuta.az böyük məbləğə satıla bilən beş klassik "Disney" kolleksiya əşyasını təqdim edir:

1940-cı illərə aid “Fantasia” film posteri

“Fantasia” filmində bir-birindən simvolik səhnə və təsvirlər o qədər çoxdur ki, hansının daha fərqləndiyini demək çətindir. Lakin filmin ilk nümayiş dövrünə aid posterləri nadir olduqları üçün ən çox axtarılan "Disney" xatirə əşyalarındandır.

Belə bir poster tapsanız, “The Gamer” kimi saytların məlumatına görə, onu bir neçə yüz dollardan 8 min dollara qədər qiymətə sata bilərsiniz.

Qara almaz seriyalı VHS kasetlər

Son dörd onillikdə "Disney" pərəstişkarı olmusunuzsa, çox güman ki, sevdiyiniz film və ya televiziya şousunun VHS kasetini almısınız. Kasetin yan hissəsində ağ hərflərlə “The Classics” yazısı olan qara almaz işarəsinin olub-olmadığını yoxlayın.

Əgər belədirsə, onu minlərlə dollara sata bilərsiniz. “The Gamer”in 2024-cü il məlumatına görə, on ədəd Qara Almaz seriyalı "Disney" VHS kasetindən ibarət dəst “eBay” platformasında 41 min dollara satılıb.

Uolt Disneynin Birinci dünya müharibəsi dövrünə aid eskiz dəftəri

Uolt Disneynin şəxsi istifadəsində olmuş hər hansı əşya hərraclarda yüksək qiymətə satılır. Bunlardan biri də onun Birinci dünya müharibəsi zamanı istifadə etdiyi eskiz dəftəridir. Həmin dəftərdə gələcəkdə "Disney" imperiyasına çevriləcək yaradıcılıq ideyalarının ilkin izləri yer alır.

Bu eskiz dəftəri 2020-ci ildə keçirilən hərracda 75 min dollara satılıb.

“Trail of the Unicorn” limuzin heykəlciyi

1996-cı ildə "Disney" tərəfindən satışa çıxarılan bu fiqurda Skruj Makdak, Donald Dak və onların qardaşıoğlanları Hyui, Dyui və Lui uzadılmış limuzində təsvir olunub. Bu kolleksiya əşyası kifayət qədər böyükdür və rəfdə xeyli yer tutur.

“The Gamer” 162 min dollar dəyərində elanla rastlaşıldığını bildirib.

“Uçan fil” attraksionundan “Dumbo” maketi

Yalnız "Disney"i deyil, həm də onun əyləncə parklarını sevənlər üçün attraksionlardan birinə aid “Dumbo” kabinəsi maraqlı kolleksiya əşyası ola bilər. Lakin bu əşya üçün kifayət qədər yüksək məbləğ ödəməyə hazır olmaq lazımdır. “Reuters” agentliyinin məlumatına görə, belə “uçan fil” maketlərindən biri 2018-ci ildə keçirilən hərracda 483 min dollara satılıb.