11 yaşlı uşağın təsadüfi səhvi “Popsicle” brendinin yaranmasına necə səbəb oldu?

Bu gün dünyanın ən tanınmış buzlu desert brendlərindən biri olan “Popsicle”ın yaranma hekayəsi planlaşdırılmış ixtiradan deyil, 11 yaşlı bir uşağın təsadüfi səhvindən başlayıb.

Valyuta.az xəbər verir ki, 1905-ci ildə ABŞ-ın Kaliforniya ştatında yaşayan Frenk Epperson (Frank Epperson) toz şəklində qazlı içki qarışığını su ilə stəkanda hazırlayırdı.

Qarışığı qarışdırmaq üçün istifadə etdiyi taxta çubuğu stəkanın içində saxlayan Epperson axşam saatlarında içkini eyvanda unudaraq evə daxil oldu.

Həmin gecə havanın temperaturu kəskin aşağı düşdü və stəkandakı içki tamamilə dondu. Səhər oyanan Frenk Epperson taxta çubuqdan tutaraq donmuş içkini stəkandan çıxardı və dadına baxdı. Beləliklə, çubuq üzərində təqdim olunan ilk buzlu desert təsadüf nəticəsində yarandı. Lakin bu təsadüfi kəşf dərhal biznesə çevrilmədi. Təxminən 18 il sonra, 1923-cü ildə Frenk Epperson məhsulu Kaliforniyadakı əyləncə parklarında satmağa başladı. O, 1924-cü ildə ixtirasına patent aldı.

İlk vaxtlar məhsul “Epsicle” adlanırdı. Bu ad Epperson soyadı ilə ingilis dilində "buz saçağı" mənasını verən icicle sözünün birləşməsindən yaranmışdı.

Sonradan Frenk Eppersonun uşaqları bu deserti "Pop's sicle" ("atamın buzluğu") adlandırmağa başladılar. Məhz bu ifadədən ilhamlanaraq məhsul “Popsicle” adı ilə bazara çıxarıldı.

Artan populyarlığa baxmayaraq, Frenk Epperson maliyyə çətinlikləri səbəbindən məhsulun hüquqlarını “Joe Lowe Company” şirkətinə satdı. Şirkət “Popsicle” brendini ABŞ bazarında geniş yayaraq onu ölkənin ən tanınmış buzlu desert markalarından birinə çevirdi. Hazırda “Popsicle” “Unilever” şirkətinin dondurma portfelinə daxildir və dünyanın müxtəlif ölkələrində satışdadır.

“Popsicle”ın yaranma hekayəsi göstərir ki, bəzən qlobal brendlərin əsası uzun illər planlaşdırılan layihələrdən deyil, gündəlik həyatda baş verən təsadüfi hadisələrdən qoyulur.

Mayya Hüseynova