"Disney"lə əməkdaşlıq edən məşhur dondurma şirkəti niyə batdı?

ABŞ-da kiçik bir dondurma dükanından başlayaraq milyonlarla dollarlıq şirkətə çevrilən "Ample Hills Creamery" sürətli böyümənin yaratdığı maliyyə problemləri səbəbindən fəaliyyətini iflasla başa vurub.

Valyuta.az xəbər verir ki, şirkətin həmtəsisçisi Brayan Smit əvvəlcə evdə hazırladığı fərqli dadlı dondurmalarla tanınıb. 2010-cu ildə həyat yoldaşı Ceki Kuskuna ilə birlikdə Bruklində ilk mağazasını açan cütlük qısa müddətdə böyük uğur qazanıb. Şirkət 2020-ci ilə qədər ABŞ-ın dörd ştatında 16 mağaza açıb, illik dövriyyəsi 10 milyon dollara, bazar dəyəri isə 40 milyon dollara çatıb.

Şirkətin qeyri-adi dadları "Disney" və Oprah Winfrey kimi məşhur adların da diqqətini cəlb edib. Hətta "Disney" ilə əməkdaşlıq çərçivəsində "Star Wars" mövzulu xüsusi dondurmalar hazırlanıb.

Lakin Harvard Biznes Məktəbinin hazırladığı araşdırmaya görə, məhz bu sürətli uğur şirkətin ən böyük səhvinə çevrilib. Ample Hills sürətlə genişlənmək üçün vençur investisiyası və bank kreditləri hesabına təxminən 20 milyon dollar cəlb edib, bahalı istehsal zavodu tikib və qısa müddətdə çoxsaylı mağazalar açıb. Ancaq satışlar bu investisiyaları qarşılamağa kifayət etməyib.

2020-ci ildə investorlardan yeni maliyyə dəstəyi ala bilməyən şirkət iflasdan qoruna bilməyib. Sonradan onun aktivləri cəmi 1 milyon dollara başqa şirkət tərəfindən satın alınıb.

Bununla belə, təsisçilər biznesdən tamamilə uzaqlaşmayıblar. Onlar 2021-ci ildə Bruklində yeni dondurma mağazası açaraq yenidən fəaliyyətə başlayıblar. Bu dəfə isə vençur kapitalından imtina edib, daha ehtiyatlı böyümə strategiyasına üstünlük veriblər.

Harvard Biznes Məktəbinin ekspertləri hesab edirlər ki, bu hekayə sahibkarlar üçün mühüm dərsdir. Onların fikrincə, sürətli böyümə hər zaman uğur demək deyil və biznesi genişləndirərkən maliyyə intizamını qorumaq, düzgün investor seçmək və davamlı inkişaf strategiyası qurmaq vacibdir.

Sərvanə Rəmixanova