Süni intellekt startapı 40 milyon dollarlıq investisiya cəlb edib

ABŞ-də fəaliyyət göstərən süni intellekt startapı "Bespoke Labs" 40 milyon ABŞ dolları həcmində investisiya cəlb edib.

Valyuta.az xəbər verir ki, investisiya iki mərhələdən ibarət olub.

Toxum investisiyası raunduna "8VC" rəhbərlik edib. Raundda "Google"un baş alimi Ceff Din (Jeff Dean), "Resolve AI" şirkətinin baş icraçı direktoru Spiros Ksantos, "DevRev"in baş icraçı direktoru Dhirac Pandey və digər investorlar iştirak ediblər.

A seriyası investisiya raunduna isə "Wing VC" rəhbərlik edib. Raundda "Mayfield", "The House Fund", "dbt Labs" şirkətindən Tristan Handy, həmçinin "Anthropic", "OpenAI" və "Meta" ekosisteminin investorları da yer alıblar.

2024-cü ildə Maheş Satiyamurti (Mahesh Sathiamoorthy) və Aleks Dimakis (Alex Dimakis) tərəfindən təsis edilib. "Bespoke Labs" yeni vəsaiti tədqiqat komandasını genişləndirmək, süni intellekt agentləri üçün hazırladığı infrastrukturun miqyasını artırmaq və şirkətin inkişafını sürətləndirmək üçün istifadə edəcəyini açıqlayıb.

Şirkət süni intellekt agentlərinin daha etibarlı işləməsini və mürəkkəb tapşırıqları müstəqil şəkildə yerinə yetirməsini təmin edən təlim və qiymətləndirmə infrastrukturu hazırlayır. Məqsəd süni intellekt modellərini təkcə qısa sorğulara cavab verən sistemlərdən uzunmüddətli planlaşdırma aparan, qərar qəbul edən və real iş proseslərini icra edə bilən agentlərə çevirməkdir.

Qeyd edək ki, "Bespoke Labs"ın platforması agentlərin sınaqdan keçirilməsi üçün xüsusi simulyasiya mühitləri və qiymətləndirmə alətləri təqdim edir. Bu infrastruktur vasitəsilə şirkətlər və süni intellekt laboratoriyaları agentlərin performansını ölçə, çatışmazlıqları müəyyən edə və modelləri daha yüksək dəqiqliklə təkmilləşdirə bilirlər.

Rəfiqə Abdin