"Kəpəz" BOKT-un 1 milyon manatlıq istiqrazları üzrə hərracın tarixi açıqlanıb

Bakı Fond Birjasının (BFB) Listinq Komitəsinin 6 iyul 2026-cı il tarixli qərarı ilə "Kəpəz" BOKT-un istiqrazlarının ticarətə buraxılmasına icazə verilib.

Valyuta.az xəbər verir ki, istiqrazların yerləşdirilməsi üzrə kütləvi birqiymətli hərrac 14 iyul 2026-cı il tarixində keçiriləcək.

Emissiyanın ümumi həcmi 1 milyon manat təşkil edir. Buraxılış çərçivəsində nominal dəyəri 100 manat olan 10 min ədəd faizli, təmin edilməmiş, sənədsiz, adlı istiqraz investorlara təklif olunacaq.

İstiqrazların illik gəlirlilik dərəcəsi 15%, tədavül müddəti isə 24 ay müəyyən edilib. Faiz ödənişləri ilk istiqrazın yerləşdirildiyi tarixdən etibarən hər ay həyata keçiriləcək.

Qiymətli kağızların dövlət qeydiyyat nömrəsi (ISIN) AZ2014020807-dir. İstiqrazların anderrayteri “Troni İnvestisiya Şirkəti” QSC-dir.

İnvestorlar emissiya prospekti ilə Bakı Fond Birjasının rəsmi internet səhifəsində emitentin profili bölməsindən tanış ola bilərlər.