Eren Balinin startapı “Monogram” 40 milyon dollar investisiya alıb

“Udemy” və “Carbon Health” şirkətlərinin həmtəsisçilərindən olan Eren Balinin yeni süni intellekt startapı “Monogram” 40 milyon dollar həcmində toxum investisiyası cəlb etdiyini açıqlayıb.

Valyuta.az xəbər verir ki, startap süni intellekt təcrübəsini ənənəvi söhbət interfeysindən kənara çıxararaq vizual və interaktiv istifadəçi interfeysi təqdim etməyə fokuslanır.

Qeyd edək ki, “Monogram” eyni zamanda “iOS” tətbiqini də istifadəyə verib.

“Monogram”ın açıqlamasında bildirilir ki, süni intellekt söhbət pəncərəsindən daha funksional interfeysə ehtiyac duyur. Şirkətin hazırladığı texnologiya istifadəçinin verdiyi suala yalnız mətn şəklində cavab vermək əvəzinə, bir neçə saniyə ərzində tamamilə vizual və interaktiv interfeys yaradır. Bunun sayəsində istifadəçilər uzun mətn blokları əvəzinə birbaşa qarşılıqlı əlaqə qura biləcəkləri təcrübə əldə edirlər.

“Monogram” film tövsiyələri almaq, resept tapmaq, səyahət planlaşdırmaq, restoranlar kəşf etmək və elektrik avtomobillərini müqayisə etmək kimi gündəlik istifadə ssenariləri üçün hazırlanıb. “App Store”dakı məlumata əsasən, tətbiq ənənəvi süni intellekt köməkçilərindən fərqli olaraq çatbot kimi fəaliyyət göstərmir, istənilən suala dərhal vizual və interaktiv cavab təqdim edir.

Tətbiq hazırda ödənişsizdir, yalnız “iPhone” cihazları üçün əlçatandır və “iOS 26.0” və ya daha yeni versiyanı tələb edir.

Eren Bali “X” platformasında paylaşdığı açıqlamada bildirib ki, “Monogram” qapalı sınaq mərhələsindən çıxıb. O, “Monogram”ı tamamilə vizual interfeys üzərində qurulan ilk süni intellekt tətbiqi kimi xarakterizə edib.

“Monogram”ın yanaşması göstərir ki, startap süni intellekt bazarında getdikcə daha çox ön plana çıxan interfeys səviyyəsindəki rəqabətə qoşulub. Şirkət böyük dil modellərinin imkanlarını yalnız mətn əsaslı söhbət təcrübəsi ilə məhdudlaşdırmaq əvəzinə, istifadəçinin ehtiyacına uyğun formalaşan dinamik interfeyslər vasitəsilə təqdim etməyi hədəfləyir.

Mayya Hüseynova