“ING” “Singular Bank”ın 40 faiz payını alır

Niderlandın “ING” bankı İspaniyanın sərvətlərin idarə olunması üzrə ixtisaslaşmış “Singular Bank”ından təxminən 40 faizlik payın alınması barədə razılığa gəlib.

Valyuta.Az-ın xarici KİV-ə istinadən verdiyi məlumata görə, bank bu payı hazırda “Singular Bank”ın 93 faizinə sahib olan özəl kapital şirkəti “Warburg Pincus”dan alacaq.

Sövdələşmənin maliyyə şərtləri açıqlanmayıb.

Əməliyyat tamamlandıqdan sonra “Singular Bank” İspaniyanın özəl bankçılıq bazarında müstəqil qurum kimi fəaliyyətini davam etdirəcək.

Şirkətin müştərilərə məxsus investisiya aktivləri təxminən 19 milyard avro (21,6 milyard ABŞ dolları) təşkil edir. Bank yüksək gəlirli müştərilərə geniş çeşiddə məhsul və xidmətlər təqdim edir.

“ING” “Singular Bank”ın təkliflərini öz xidmətlərini tamamlayan hesab etdiyini bildirib və qeyd edib ki, sövdələşmə bankın İspaniyada özəl bankçılıq və sərvətlərin idarə edilməsi sahəsində inkişafını sürətləndirəcək.

Bank əlavə edib ki, bu addım konkret müştəri qrupları üçün fərdiləşdirilmiş xidmətlərin göstərilməsinə yönəlmiş “Growing the difference” strategiyasına uyğundur.

Tərəflər müştəri bazasının və aktivlərin artırılması, strateji əməkdaşlığın genişləndirilməsi, həmçinin yeni biznes imkanlarından istifadə istiqamətində artıq müəyyənləşdirilmiş kommersiya imkanlarını inkişaf etdirmək barədə razılığa gəliblər.

Şirkətlər gələcəkdə mülkiyyət strukturunu yenidən qiymətləndirməyi də planlaşdırırlar. Bu, “ING”nin gələcəkdə bankdakı payını artırması imkanını nəzərdə tutur.

Mənbələr may ayında “Reuters” agentliyinə bildiriblər ki, İtaliyanın “Intesa Sanpaolo” bankı da “Singular Bank”la maraqlanan tərəflər arasında olub. Bu məlumat daha əvvəl “Financial Times”ın “Warburg Pincus”un bütün payını 300 milyon avroya satmaq istədiyi barədə xəbərini təsdiqləyib.

“ING” bildirib ki, əməliyyatın bankın CET1 kapital adekvatlığı əmsalına minimal təsir göstərəcəyi gözlənilir.

Sövdələşmənin tənzimləyici orqanların təsdiqindən sonra 2027-ci ilin birinci rübündə tamamlanacağı gözlənilir.

“Singular Bank”a rəhbərliyi Xavyer Marin (Javier Marín) davam etdirəcək.

Marin və idarəetmə komandası, həmçinin bir sıra maliyyə institutları və ispaniyalı investorlar bankdakı səhmlərinin bir hissəsini saxlayacaqlar.

“ING” 25 ildir İspaniyada pərakəndə bankçılıq sahəsində fəaliyyət göstərir və ödənişlər, əmanətlər, ipoteka kreditləri və investisiya xidmətləri üzrə 4,6 milyon müştəriyə xidmət göstərir. Bankın korporativ bankçılıq bölməsi isə bu ölkədə 1982-ci ildən fəaliyyət göstərir.

“ING”nin baş icraçı direktoru Stiven van Reysvik (Steven van Rijswijk) bildirib:

“Singular Bank”a investisiya qoyuluşu artımı sürətləndirmək, təsiri genişləndirmək və dəyər yaratmaqla Avropanın ən yaxşı bankı olmaq strategiyamızın növbəti məntiqi addımıdır.