"Berkshire Hathaway"in portfelinin 58%-i cəmi beş "Dow" şirkətində cəmlənib

"Uorren Baffett"in varisi kimi seçilən və hazırda "Berkshire Hathaway"in baş icraçı direktoru vəzifəsini icra edən Qreq Abel şirkətin investisiya strategiyasində yüksək keyfiyyətli "blue chip" səhmlərinə üstünlük verməyə davam edir.

Valyuta.az xəbər verir ki, hazırda holdinqin səhm portfelinin təxminən 58%-i "Dow Jones Industrial Average" indeksinə daxil olan cəmi beş şirkətin səhmlərində cəmləşib.

CNBC-nin məlumatına görə, "Berkshire Hathaway"in ən böyük səhm mövqeyi portfelin 20,5%-ni təşkil edən "Apple"dir. Onu 15,6%-lə "American Express", 9,8%-lə "Coca-Cola", 9,1%-lə "Alphabet" və 4,1%-lə "Chevron" izləyir.

Analitiklər hesab edirlər ki, bu beş şirkət arasında hazırda ən cəlbedici investisiya seçimi "Alphabet"dir.

Şirkətin səhmləri may ayının əvvəlindən müəyyən zəifləmə nümayiş etdirsə də, ekspertlər bunu alış üçün əlverişli imkan kimi qiymətləndirirlər.

"Alphabet"in əsas üstünlüyü internet ekosistemində dominant mövqeyini qorumasıdır.

"Statcounter" məlumatına əsasən, "Google Search" qlobal axtarış bazarının təxminən 91%-nə nəzarət edir.

Eyni zamanda, "Gmail" dünyanın ən geniş istifadə olunan elektron poçt xidmətlərindən biri olaraq qalır, "Android" əməliyyat sistemi isə qlobal mobil cihazların təxminən 70%-də istifadə olunur.

Şirkətin gəlirlərinin 80%-dən çoxu "Google" xidmətləri, o cümlədən "YouTube" platforması hesabına formalaşır. Bununla yanaşı, "Alphabet" son illərdə bulud texnologiyaları və süni intellekt sahəsində də sürətli inkişaf nümayiş etdirir.

2026-cı ilin birinci rübündə "Google Cloud"un gəlirləri illik müqayisədə 63% artıb. Şirkət həmçinin öz süni intellekt prosessorlarını hazırlayaraq bulud xidmətlərində istifadə edir və "Gemini" süni intellekt platformasını inkişaf etdirməyə davam edir.

Mütəxəssislər bildirirlər ki, "Gemini" hələ də "ChatGPT"dən geri qalsa da, bazarda mövqeyini tədricən gücləndirir və gələcəkdə süni intellekt xidmətləri bazarında əsas oyunçulardan birinə çevrilə bilər.

Bazar analitiklərinin böyük əksəriyyəti "Alphabet" səhmlərinə "güclü al" reytinqi verir. Onların konsensus qiymət hədəfi 435,83 ABŞ dollarıdır ki, bu da səhmlərin hazırkı qiymətindən təxminən 20% yüksəkdir.

Bununla belə, "The Motley Fool" qeyd edir ki, onun "Stock Advisor" analitik komandası hazırda investorlar üçün tövsiyə etdiyi 10 ən perspektivli səhm siyahısına "Alphabet"i daxil etməyib və investisiya qərarı verməzdən əvvəl bütün risklərin nəzərə alınmasını tövsiyə edir.

Tənzilə Ağabalayeva