600 min dollardan çox investisiyanı necə cəlb etmək olar? - Təsisçisi izah edir

"Deepen" şirkətinin təsisçisi və baş icraçı direktoru (CEO) Fərhod Furqatov startapın 600 min dollardan çox investisiyanı hansı strategiya ilə cəlb etdiyini, investorlarla işləmək prosesində qazandığı təcrübəni və bu yolda buraxdığı səhvləri bölüşüb.

Valyuta.az "TheTech"ə istinadən xəbər verir ki, investisiya cəlb etmək təkcə uğurlu ideyadan deyil, uzunmüddətli hazırlıqdan, şəxsi əlaqələrdən və davamlı danışıqlardan asılıdır.

Furqatov bildirib ki, "Deepen" üzərində işlədiyi bir il yarım ərzində 100-dən çox investorla görüş keçirib və müəyyən dövrlərdə investisiya cəlb etmək prosesi bütün vaxtının və enerjisinin təxminən 60 faizini alıb.

Təsisçinin sözlərinə görə, şirkət ilk investisiyasını Cənubi Koreyadan olan biznes mələyindən alıb. Bu tanışlıq şəxsi əlaqələr vasitəsilə baş tutub və beşgünlük Koreya səfəri ilə davam edib. Həmin müddətdə investor maliyyə göstəricilərindən daha çox təsisçinin intizamını, motivasiyasını və məqsədyönlülüyünü qiymətləndirib.

İlk investisiya raundu şirkətin 750 min dollar dəyərində qiymətləndirilməsi əsasında bağlanıb. İnvestor 20 faiz pay müqabilində 150 min dollar sərmayə yatırıb. Daha sonra bu raunda yerli biznes mələkləri də qoşulublar.

Şirkət bazarda təxminən bir il yarım fəaliyyət göstərdikdən və sabit ödəniş edən müştəri bazası formalaşdırdıqdan sonra vençur fondundan növbəti investisiyanı cəlb edib. Son "bridge" investisiya raundunda isə "Deepen" 6 milyon dollar qiymətləndirmə ilə 300 min dollar investisiya əldə edib. Beləliklə, şirkətin bazar dəyəri ilk raundla müqayisədə səkkiz dəfə artıb.

Furqatov bildirib ki, investorlarla münasibətlərə maliyyəyə ehtiyac yaranmamışdan xeyli əvvəl başlamaq vacibdir. Onun fikrincə, əgər investisiya raundunun altı ay sonra bağlanması planlaşdırılırsa, hazırlıq işlərinə indidən başlanmalı, investorların diqqət yetirdiyi göstəricilər öyrənilməli və şirkətin inkişafı buna uyğun planlaşdırılmalıdır.

Təsisçi qeyd edib ki, investorların tapılmasında şəxsi əlaqələr, investisiya klubları və peşəkar şəbəkələşmə mühüm rol oynayıb. Müxtəlif tədbirlərdə iştirak, mentorluq fəaliyyəti və münsif qismində çıxış etmək yeni əlaqələrin qurulmasına kömək edib.

Onun sözlərinə görə, investorlarla görüşlər zamanı şirkət özünü tanınmış beynəlxalq məhsullarla müqayisə etməklə təqdim edib. Belə ki, "Deepen" "Mindbody"nin B2B həllərini, "Strava"nın icma modelini və "Whoop"un geyilə bilən cihaz konsepsiyasını inkişaf etməkdə olan bazar üçün birləşdirən platforma kimi təqdim olunub. Bu yanaşma nəticəsində şirkət həmin sahədə ixtisaslaşan investorların diqqətini cəlb edə bilib.

Furqatov etiraf edib ki, geriyə baxdıqda ilk investisiya raundunda 20% pay qarşılığında 150 min dollar cəlb etmək əvəzinə, 10% pay müqabilində 75 min dollar investisiya almağın daha məqsədəuyğun olacağını düşünür. Onun fikrincə, erkən mərhələdə şirkətin böyük hissəsini investorlara verməyə tələsmək düzgün yanaşma deyil.

Təsisçi startap qurucularına biznesi yaxşı bildikləri sahədə qurmağı, minimum işlək məhsulu (MVP) mümkün qədər tez bazara çıxarmağı və ilk müştərilərdən ödəniş almağa fokuslanmağı tövsiyə edib. O vurğulayıb ki, erkən mərhələdə investorlar əsasən maliyyə göstəricilərinə deyil, təsisçinin motivasiyasına, intizamına və məqsədə çatmaq əzminə investisiya yatırırlar.

Mayya Hüseynova