Yeni "Gulfstream" təyyarəsi sürət və məsafə üzrə dünya rekordları qırdı

ABŞ-ın "Gulfstream" şirkəti yeni G800 modelinin biznes aviasiya tarixində həm ən uzaq, həm də ən sürətli uçuşları həyata keçirdiyini açıqlayıb.

Valyuta.az xəbər verir ki, şirkətin məlumatına görə, təyyarə iyun ayında İslandiyanın Reykyavik şəhərindən ABŞ-ın Corciya ştatının Savanna şəhərinə 5505 km məsafəni 5 saat 52 dəqiqəyə qət edib. Uçuş zamanı orta sürət 0,91 Mach səviyyəsində olub. Bu reys "Gulfstream" üçün şəhər cütlükləri üzrə 800-cü sürət rekordu kimi qeydə alınıb.

Ayın sonunda G800 daha bir rekord müəyyən edib: Avstraliyanın Melburn şəhərindən ABŞ-ın İllinoys ştatının Moline şəhərinə 15 377 km məsafə qət olunub. Uçuş 16 saat 56 dəqiqə davam edib və orta sürət 0,85 Mach təşkil edib.

"Gulfstream" prezidenti Mark Burns bu nəticələrin şirkətin yeni nəsil aviasiya texnologiyalarını nümayiş etdirdiyini bildirib. Şirkət qeyd edir ki, indiyədək Gulfstream təyyarələri ümumilikdə 815 dünya sürət rekordu müəyyən edib.

2025-ci ilin avqustunda istismara verilmiş G800 artıq bu rekordların 15-nə imza atıb.

G800 modeli uzun məsafəli biznes uçuşları üçün nəzərdə tutulub. Onun maksimal uçuş məsafəsi 15 186 km-ə qədərdir. Təyyarə 0,935 Mach maksimal sürətə çata bilir və yüksək yanacaq səmərəliliyi ilə seçilir.

Sərnişin salonunda hər 2–3 dəqiqədən bir tam hava yenilənməsi sistemi, plazma hava təmizləmə texnologiyası və 16 panoramik pəncərə mövcuddur. Təyyarə dörd yaşayış zonası və ya üç zonalı ekipaj konfiqurasiyası ilə təchiz oluna bilir. Modelin qiyməti təxminən 72,5 milyon dollar təşkil edir.

Paşa Məmmədli