“Kim nə qədər ödəyəcək?” sualından yaranan ideya milyonlarla insanın istifadə etdiyi tətbiqə çevrildi

Dostlarla səyahətə çıxarkən, otaq yoldaşları ilə kirayə haqqını bölüşərkən və ya ortaq alış-veriş etdikdən sonra yaranan ən böyük problemlərdən biri xərclərin düzgün hesablanmasıdır.

Valyuta.az xəbər verir ki, məhz bu gündəlik ehtiyacdan yaranan "Splitwise" bu gün dünyada ən çox istifadə olunan xərc bölüşdürmə tətbiqlərindən biridir.

"Splitwise" 2011-ci ildə Conatan Bittner (Jonathan Bittner), Rayan Laflin (Ryan Laughlin) və Marşall Veir (Marshall Weir) tərəfindən yaradılıb. Layihə ilk olaraq "SplitTheRent" adı ilə istifadəyə verilib və əsas məqsədi otaq yoldaşlarının kirayə və kommunal xərclərini rahat şəkildə bölüşdürməsinə kömək etmək olub.

Qurucular daha sonra insanların yalnız kirayə haqqını deyil, dostlarla səyahət, restoran hesabı, hədiyyə alış-verişi və digər ortaq xərcləri də rahat şəkildə idarə etməyə ehtiyac duyduğunu görüblər. Bunun nəticəsində platforma genişləndirilib və Splitwise adı ilə istifadəyə təqdim olunub.

Tətbiq istifadəçilərə bütün ortaq ödənişləri bir platformada qeyd etməyə, kimin nə qədər ödədiyini izləməyə və yekun borc balansını avtomatik hesablamağa imkan verir. Bu yanaşma uzun hesablamalara və əl ilə aparılan bölüşdürmələrə ehtiyacı aradan qaldırıb.

Şirkət fəaliyyətə başladığı vaxtdan etibarən investorların da diqqətini cəlb edib. "Splitwise" indiyədək 30 milyon ABŞ dollarından çox investisiya cəlb edib. Bunun ən böyük hissəsi 2021-ci ildə "Insight Partners" fondunun rəhbərlik etdiyi maliyyələşdirmə raundunda əldə olunan 20 milyon ABŞ dolları olub.

Şirkətin açıqladığı məlumatlara görə, istifadəçilər bu günədək "Splitwise" platforması vasitəsilə 90 milyard ABŞ dollarından çox ortaq xərci qeyd edib və idarə ediblər. Platformanın hazırda 10 milyondan çox aylıq aktiv istifadəçisi olduğu bildirilir.

"Splitwise"in hekayəsi göstərir ki, uğurlu startap yaratmaq üçün hər zaman mürəkkəb texnologiya və ya inqilabi ideya tələb olunmur. Bəzən insanların hər gün qarşılaşdığı sadə bir problemi praktik və rahat şəkildə həll etmək kifayət edir ki, həmin ideya milyonlarla insanın istifadə etdiyi qlobal məhsula çevrilsin.

Mayya Hüseynova