Almaniya startapı 1,2 milyard dollar investisiya cəlb etdi

Almaniyanın pilotsuz uçuş aparatları (PUA) istehsalçısı "Quantum Systems" 1,2 milyard dollarlıq Seri D investisiya raundunu uğurla başa vurub.

Valyuta.az xbər  verir ki, yeni maliyyələşmə nəticəsində şirkətin bazar dəyəri 8 milyard dollara yüksəlib.

Şirkət cəlb olunan vəsaiti istehsal gücünün artırılmasına, beynəlxalq fəaliyyətinin genişləndirilməsinə və avtonom hava sistemləri üzrə məhsul inkişafının sürətləndirilməsinə yönəltməyi planlaşdırır.

2015-ci ildə təsis edilən "Quantum Systems" ilk illərdə kənd təsərrüfatı, xəritələşdirmə və infrastrukturun monitorinqi üçün elektrik mühərrikli, şaquli qalxma və enmə qabiliyyətinə malik (eVTOL) pilotsuz uçuş aparatları hazırlayırdı.

Lakin Rusiya-Ukrayna müharibəsindən sonra Avropada müdafiə texnologiyalarına tələbatın artması fonunda şirkət fəaliyyət istiqamətini dəyişərək hərbi kəşfiyyat və müşahidə sistemlərinin hazırlanmasına üstünlük verib. Bu dəyişiklik "Quantum Systems"ın sürətlə böyüməsinə təkan verib.

Şirkətin həmtəsisçisi və baş icraçı direktoru Florian Seibel bildirib ki, yeni investisiya yalnız böyümə üçün maliyyə təmin etməyib, həm də səhmdar strukturunun yenidən formalaşdırılmasına və müdafiə sahəsində fəaliyyətin genişləndirilməsinə imkan yaradıb.

Şirkət gələcəkdə daha qabaqcıl müdafiə sistemlərinin hazırlanmasını davam etdirməyi, həmçinin birjada ilkin kütləvi təklif (IPO) imkanını da qiymətləndirməyi planlaşdırır.