AMB 4 ödəniş təşkilatında nöqsanlar aşkarlayıb

Azərbaycan Mərkəzi Bankı “Global İnnovations” MMC, “United Payment” MMC, “Baku Pay” MMC və “Fizza Pay” MMC ilə bağlı icrası məcburi göstərişlər verib.

Valyuta.az xəbər verir ki, bu barədə Mərkəzi Bank məlumat yayıb.

Məlumata görə, “Global İnnovations” MMC-yə məcmu kapitalın minimum məbləği üzrə tələbin, eləcə də ödəniş təşkilatları və elektron pul təşkilatları üçün müəyyən edilmiş digər tələblərin pozulması hallarının aradan qaldırılması ilə bağlı icrası məcburi göstəriş verilib.

“United Payment” MMC-də aparılmış yerində yoxlama zamanı aidiyyəti qanunvericilik və normativ aktların tələblərinin pozulması halları aşkarlanıb. Bununla əlaqədar şirkətə cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində çatışmazlıqların aradan qaldırılması üçün icrası məcburi göstərişlər verilib.

“Baku Pay” MMC-də keçirilmiş planlı yoxlama nəticəsində də qanunvericilik və normativ aktların tələblərinin pozulması halları müəyyən edilib. Mərkəzi Bank şirkətə ödəniş xidməti istifadəçilərinə məxsus pul vəsaitlərinin təhlükəsizliyinin təmin edilməsi, daxili nəzarət, daxili audit və risklərin idarə edilməsi sahələrində çatışmazlıqların aradan qaldırılması üçün icrası məcburi göstərişlər verib.

“Fizza Pay” MMC-yə isə müəyyən edilmiş müddətədək daxili nəzarət sistemlərinin təkmilləşdirilməsi, daxili audit və risklərin idarə edilməsi sahələri üzrə kadr potensialının gücləndirilməsi ilə bağlı icrası məcburi göstəriş verilib.