"Google" Aİ-yə 4,1 milyard avroluq cərimə ödəyəcək

"Alphabet" şirkətinə məxsus "Google" "Android" əməliyyat sistemi ilə bağlı Avropa İttifaqının tətbiq etdiyi 4,1 milyard avro məbləğində antiinhisar cəriməsinə qarşı apellyasiya şikayətini uduzub.

Valyuta.az xəbər verir ki, Avropa İttifaqının Ədalət Məhkəməsi aşağı instansiya məhkəməsinin qərarını qüvvədə saxlayaraq, "Google"un bazardakı dominant mövqeyindən sui-istifadə etdiyini təsdiqləyib.

Avropa Komissiyası 2018-ci ildə "Google"u Android cihaz istehsalçılarını "Google Search", "Chrome" və "Google Play" tətbiqlərini əvvəlcədən quraşdırmağa məcbur etməkdə, həmçinin alternativ Android sistemlərinin istifadəsinə mane olmaqda ittiham edərək 4,34 milyard avro cərimələyib. Sonradan bu məbləğ 4,1 milyard avroya endirilib.

"Google" məhkəmə qərarının "Android" ekosisteminin açıq və əlçatan saxlanılması üçün etdiyi investisiyaları nəzərə almadığını bildirib. Şirkət əlavə edib ki, hələ 2018-ci ildən etibarən müqavilələrini Avropa Komissiyasının tələblərinə uyğunlaşdırıb və innovasiyalara yatırım etməyə davam edir.

Qeyd edək ki, "Google" son illərdə Avropa İttifaqında antiinhisar qaydalarının pozulmasına görə ümumilikdə 11 milyard avroya yaxın cərimə ilə üzləşib. Şirkətin rəqəmsal bazarlar haqqında qanun (DMA) çərçivəsində axtarış nəticələrində öz xidmətlərinə üstünlük verməsi və tətbiq mağazası ilə bağlı fəaliyyətinə görə yeni cərimələrlə qarşılaşa biləcəyi də bildirilir.

Sərvanə Rəmixanova