Biznes-psixoloq hər addımı nəzarətdə saxlayan rəhbərlə işləməyin yollarını açıqladı

Rəhbərin əməkdaşın hər addımını yoxlaması hər zaman ona etimad göstərməməsi anlamına gəlmir. Çox vaxt belə idarəetmə tərzinin arxasında qeyri-müəyyənlik qorxusu və risklərin öhdəsindən gələ bilməmək narahatlığı dayanır. 

Valyuta.az xəbər verir ki, bu barədə biznes-psixoloq, iqtisadçı, iqtisad elmləri namizədi Yekaterina Katalina gazeta.ru-ya danışıb.

Onun sözlərinə görə, belə idarəetmə üslubu əməkdaşdan narazılıqdan deyil, qeyri-müəyyənlik qorxusundan irəli gəlir. Ekspert bildirib ki, işçi həmin komandada fəaliyyətini davam etdirmək istəyirsə, rəhbəri dəyişməyə çalışmaq əvəzinə onun idarəetmə tərzini qəbul etməli və qeyri-müəyyənliyi azaltmağa çalışmalıdır.

Belə rəhbərlər tez-tez işin qaralama variantını göndərməyi xahiş edir, müddətləri dəqiqləşdirir, xırda detallar barədə suallar verir və əvvəllər müzakirə olunmuş məsələlərə yenidən qayıdırlar.

Kənardan bu davranış etimadsızlıq və ya bezdirici mikroidarəetmə kimi görünə bilər. Lakin əksər hallarda rəhbərin əsas məqsədi prosesin nəzarət altında olduğuna və son anda xoşagəlməz sürprizlərin yaranmayacağına əmin olmaqdır.

Katalinanın sözlərinə görə, belə rəhbərlə etimad mövzusunda mübahisə etmək adətən nəticə vermir. “Mənə etibar edin” ifadəsi narahat rəhbər üçün nəzarətdən imtina etmək təklifi kimi qəbul olunur. Buna görə də nəzarət ehtiyacına qarşı çıxmaq əvəzinə, rəhbərə əməkdaşla işləmək üçün rahat və təhlükəsiz format təqdim etmək daha məqsədəuyğundur.

Ekspert əməkdaşlara gün ərzində qısa iş yeniləmələrini, məsələn, saat 10:00, 13:00 və 17:00-da göndərməyi tövsiyə edib.

Belə məlumatlarda dörd əsas məqam əks olunmalıdır: görülən iş, hazırda görülən iş, növbəti addım və mövcud suallar. Bunun üçün geniş hesabat hazırlamağa ehtiyac yoxdur. Bir neçə cümlə kifayətdir. Məsələn: “İlkin məlumatları topladım, hazırda məlumatları yoxlayıram, saat 15:00-da ilk variantı göndərəcəyəm, razılaşdırma müddəti ilə bağlı cavab lazımdır”.

“İşləyirəm”, “demək olar ki, hazırdır”, “proses davam edir” kimi ümumi ifadələr rəhbərin narahatlığını azaltmır. Çünki bu cür məlumatlarda konkret faktlar, müddətlər və növbəti addımlar göstərilmir. Nəticədə rəhbər əlavə suallar verməyə davam edir. Dəqiq və konkret ifadələr isə əlavə izahatlara ehtiyacı azaldır.

Katalina həmçinin anlaşılmaz məqamları və səhvləri gizlətməməyi məsləhət görüb. Onun fikrincə, narahat rəhbər üçün gec aşkar olunan problem çox vaxt problemin özündən daha ağır qəbul edilir. Əgər əməkdaş uzun müddət susur və sonradan işin gecikdiyini bildirirsə, rəhbərdə nəzarəti daha erkən və daha sərt həyata keçirməli olduğu düşüncəsi formalaşır.

Bununla yanaşı, ekspert vurğulayıb ki, narahat rəhbərin davranışına sonsuz bəraət qazandırmaq olmaz. Əgər nəzarət gecə saatlarında göndərilən mesajlara, alçaldıcı münasibətə, müstəqil qərarlara görə cəzalandırılmağa və ya tapşırıqların qeydiyyatsız şəkildə davamlı dəyişdirilməsinə çevrilirsə, qısa yeniləmələr problemi həll etməyəcək. Bu halda məsələ artıq şəxsi sərhədlər və idarəetmənin keyfiyyəti ilə bağlıdır.

Paşa Məmmədli