"Meta" rəhbəri: Süni intellekt agentlərinin inkişafı zəifdir

"Meta" şirkətinin baş icraçı direktoru Mark Zukerberq bildirib ki, şirkətin inkişaf etdirdiyi süni intellekt agentlərinin inkişaf tempi gözləniləndən daha zəif olub.

Valyuta.az xəbər verir ki, Zukerberq son dörd ay ərzində agent əsaslı süni intellekt texnologiyalarının inkişafının gözlənildiyi kimi sürətlənmədiyini, yeni təşkilati strukturdan gözlənilən nəticələrin hələ əldə olunmadığını deyib.

Onun sözlərinə görə, bu sistemlər istifadəçilərin adından müxtəlif tapşırıqları avtomatik yerinə yetirə bilən süni intellekt agentləridir.

Şirkət bu ilin əvvəlində həyata keçirdiyi restrukturizasiya çərçivəsində qlobal işçi qüvvəsinin təxminən 10 faizini ixtisar edib, eyni zamanda 7 minə yaxın əməkdaşı süni intellekt komandaları arasında yenidən bölüşdürüb. Bu addımlar süni intellekt infrastrukturuna yatırımları artırmaq və məhsuldarlığı yüksəltmək məqsədi daşıyıb.

Zukerberq bildirib ki, rəhbərlik restrukturizasiya planını hazırlayarkən Anthropic şirkətinin hazırladığı "Claude Code" kimi alətlərin sürətli inkişafını nəzərə alaraq daha çevik qərarlar qəbul etməyə çalışıb.

Qeyd edək ki, proqnozlara görə, "Meta" bu il süni intellekt infrastrukturuna 145 milyard ABŞ dollarına qədər vəsait xərcləyə bilər. Şirkət rəhbəri qarşıdakı 3–6 ay ərzində bu investisiyaların daha nəzərəçarpan nəticələr verəcəyini gözlədiyini bildirib.

Rəfiqə Abdin