"Robinhood" CEO-su: "Kriptonun gələcəyi real dünya aktivlərindədir"

"Robinhood"un baş icraçı direktoru (CEO) Vlad Tenev hesab edir ki, kriptovalyuta bazarında növbəti böyük inkişaf mərhələsi real dünya aktivlərinin (RWA – Real World Assets) blokçeyn üzərində tokenləşdirilməsi ilə başlayacaq.

Valyuta.az xəbər verir ki, o, bu barədə CNBC-yə müsahibəsində danışıb.

Tenevin sözlərinə görə, kripto sektorunun gələcəyi heç bir real fayda yaratmayan tokenlərin buraxılmasında deyil, səhmlər, özəl şirkətlərin payları və digər real aktivlərin blokçeynə daşınmasındadır.

"Kriptonun gələcəyi real dünya aktivlərindədir", - deyə Robinhood-un CEO-su bildirib.

Onun fikrincə, hər hansı aktiv konkret iqtisadi dəyər və ya fayda yaratmırsa, onu məhsuldar aktiv hesab etmək olmaz.

Tenev bu kontekstdə meme tokenlərə (internetdə məşhur olan zarafatlar, mimlər (meme), heyvan şəkilləri və ya populyar mədəniyyət elementlərinə əsaslanaraq yaradılan kriptovalyuta növü) də toxunaraq, "Bir milyon fərqli meme token yaratmağın nə faydası var?" sualını səsləndirib.

CEO-nun açıqlamaları "Robinhood"un tokenləşdirilmiş səhmlər xidmətini genişləndirməsindən bir gün sonra səsləndirilib.

Şirkət "Stock Tokens" adlı yeni xidmətini təqdim edib. Yeni platforma uyğun istifadəçilərə tokenləşdirilmiş səhmləri həftənin yeddi günü, günün 24 saatı alıb-satmaq imkanı verir.

"Robinhood" gələcəkdə bu aktivlərdən kredit hovuzlarında istifadə etməyi, həmçinin onların mərkəzləşdirilməmiş maliyyə (DeFi) ekosistemində girov kimi tətbiq olunmasını planlaşdırır.

Bundan əlavə, şirkət istifadəçilərə "OpenAI" kimi birjada listinq olunmayan özəl şirkətlərə dolayısı ilə investisiya imkanı yaratmaq üzərində də çalışır.

Vlad Tenev hesab edir ki, ənənəvi maliyyə sistemi ilə kriptovalyuta bazarı getdikcə daha sıx inteqrasiya olunur.

Onun sözlərinə görə, "Bitcoin" öz əhəmiyyətini itirməyəcək. Bununla belə, kripto bazarının növbəti inkişaf dalğasını məhz real dünya aktivlərinin tokenləşdirilməsi formalaşdıracaq.

Qeyd edək ki, "Robinhood" fəaliyyətə ilk olaraq fərdi investorlar üçün səhmlərin alqı-satqısını mümkün edən platforma kimi başlayıb. Şirkət son illərdə isə real dünya aktivlərinin tokenləşdirilməsi istiqamətində fəaliyyətini genişləndirərək ABŞ səhmləri və özəl şirkətlərlə bağlı törəmə maliyyə məhsullarına da maraq göstərir.

Sərvanə Rəmixanova