"HCLTech"in 1,14 milyardlıq müqaviləsi səhmlərini bahalaşdırıb 

Hindistanın proqram təminatı xidmətləri ixracatçısı olan “HCLTech” böyük Avropa şirkətlərindən biri ilə 1,14 milyard ABŞ dolları dəyərində müqavilə imzalayıb.

Valyuta.az xəbər verir ki, şirkətin açıqlamasına görə, müqavilə müştərinin qlobal rəqəmsal iş mühitinin və korporativ şəbəkələrinin transformasiyası, eləcə də idarə olunması üçün süni intellektə əsaslanan əməliyyat modelinin qurulmasını əhatə edir.

Müqavilənin müddəti 4 il 6 ay olacaq və əlavə 5 il uzadılması imkanı nəzərdə tutulur. 

Layihə tamamilə yeni biznes müqaviləsidir və mövcud müştəri ilə əməkdaşlığın davamı və ya əvvəlki müqavilənin yenilənməsi hesab edilmir.

Xəbərin açıqlanmasından sonra “HCLTech” səhmləri ticarətin əvvəlində 4,6% bahalaşıb. Bu artım "Nifty IT" indeksinə də müsbət təsir göstərərək onun 2,5% yüksəlməsinə səbəb olub.

Qeyd edək ki, şirkət 2027-ci maliyyə ilinin birinci rübü üzrə maliyyə nəticələrini 13 iyul tarixində açıqlayacaq. “HCLTech” cari maliyyə ilində gəlirlərinin 1-4% artacağını proqnozlaşdırır.

Rəfiqə Abdin