"Rolls-Royce" unikal "Phantom Regatta" modelini təqdim edib

"Rolls-Royce Motor Cars" Böyük Britaniyanın zəngin yelkənçilik irsini əks etdirən xüsusi "Phantom Extended" modeli – "Phantom Regatta"nı təqdim edib.

Valyuta.az xəbər verir ki, şirkətin "Bespoke" bölməsi tərəfindən hazırlanan yeganə nüsxə avtomobil İngiltərənin cənub sahillərindəki yarış yaxtalarından və "Solent" akvatoriyasında yay mövsümünü səciyyələndirən nüfuzlu yelkən yarışlarından ilham alıb.

"Phantom Regatta" ilk ictimai nümayişini 2026-cı ildə keçiriləcək "Goodwood Festival of Speed" tədbirində edəcək.

Avtomobilin dizaynı onun təqdim olunacağı "Goodwood" ərazisinin yaxınlığındakı sahil xəttindən ilhamlanıb.

"Goodwood Estate"dən "Çiçester" limanı və tarixi "Cowes Week" də daxil olmaqla məşhur reqataların keçirildiyi "Solent" akvatoriyası görünür.

Bu bölgə "Rolls-Royce" üçün də xüsusi əhəmiyyət daşıyır. Belə ki, şirkətin həmtəsisçisi ser Henri Roys ömrünün son illərinin böyük hissəsini "West Wittering" yaxınlığındakı "Elmstead" malikanəsində keçirib. Həmin məkan "Rolls-Royce"un qərargahından cəmi səkkiz mil məsafədə yerləşir.

Sahildən ilhamlanan eksteryer

"Phantom Regatta" klassik yelkənli yaxtanın zərifliyini xatırladan iki rəngli eksteryerə malikdir. Avtomobilin yuxarı hissəsi dərin dəniz çalarını əks etdirən "Regatta Blue", aşağı hissəsi isə "English White" rənginə boyanıb.

Əl ilə çəkilmiş ayırıcı xətt yaxta gövdəsinin su ilə təmas nöqtəsini xatırladır və dizaynda incə dəniz motivi yaradır.

Eksteryeri tamamlayan cilalanmış 22 düymlük disk təkərlər yarış yaxtalarında istifadə olunan parlaq polad vintçlərdən ilhamlanaraq hazırlanıb.

Dəniz mövzusunda hazırlanmış salon

Salonun dizaynı tam açılmış yelkən altında üzən yaxtadan ilham alıb. Ön hissə dərin sahil sularını simvolizə edən "Navy Blue" dəri ilə, arxa sərnişin bölməsi isə yelkən parçasını və qayığın arxasında yaranan köpüklü su izini əks etdirən "Grace White" dəri ilə işlənib.

Kontrast tikişlər, oturacaq haşiyələri və sükan çarxında hər iki rəng birləşdirilib. Oturacaqlardakı işlənmiş "RR" loqoları isə İngiltərə sahillərindəki dayaz suların rəngini əks etdirmək üçün seçilmiş firuzəyi çalarlı "Turchese" rəngində hazırlanıb.

Tənzilə Ağabalayeva