Yoxsul, ac və məqsədyönlü: Milyarder Maykl Li-Çin sərvət qazanmağın əsas prinsipini açıqlayıb

Milyarder investor və "Portland Holdings" şirkətinin İdarə Heyətinin sədri və baş icraçı direktoru Maykl Li-Çin hesab edir ki, böyük sərvət təsadüf nəticəsində deyil, illər boyu ardıcıl şəkildə tətbiq olunan sadə prinsiplər sayəsində formalaşır.

Onun fikrincə, maliyyə uğurunun əsasında düzgün biznes seçimi, səbir və uzunmüddətli düşüncə dayanır.

Monakoda "School of Hard Knocks" layihəsinə verdiyi müsahibədə sərvətinin həcmi ilə bağlı suala cavab vermək istəməyən Li-Çin maraqlı fikir səsləndirib.

O bildirib ki, "əgər sərvətinizin nə qədər olduğunu dəqiq bilirsinizsə, deməli, hələ həqiqətən varlı deyilsiniz". 

Daha sonra isə onu milyarder edən prinsipləri sadalayıb.

Li-Çinin sözlərinə görə, sərvət yaratmağın əsas yollarından biri yüksək keyfiyyətli, yaxşı tanınan və uzunmüddətli inkişaf potensialına malik az sayda biznesə sahib olmaqdır.

O hesab edir ki, investor seçdiyi şirkətlərin fəaliyyətini dərindən anlamalı, onların gələcək perspektivlərinə inanmalı və qısamüddətli bazar dalğalanmalarından təsirlənmədən investisiyalarını uzun illər saxlamalıdır.

Milyarder beşinci mühüm prinsip kimi isə investisiya məqsədilə borc vəsaitindən ehtiyatla istifadə etməyi göstərir.

Onun sözlərinə görə, karyerasının əvvəlində özü də kredit hesabına investisiya edib və bu addım sonradan milyardlarla dollar dəyərində sərvətin əsasını qoyub.

Maykl Li-Çinin uğur hekayəsi 1983-cü ildə başlayıb. Həmin vaxt 32 yaşlı investor 500 min ABŞ dolları borc götürərək bütün vəsaiti yaxşı tanıdığı "MacKenzie Financial" şirkətinin səhmlərinə yatırıb.

Cəmi dörd il ərzində bu investisiya təxminən yeddi dəfə dəyər qazanıb. Əldə etdiyi gəlirlə o, Ontarioda fəaliyyət göstərən kiçik qarşılıqlı investisiya fondu şirkəti "AIC"ni satın alıb.

Onun rəhbərliyi dövründə "AIC"nin idarə etdiyi aktivlərin həcmi 1 milyon ABŞ dollarından az səviyyədən 15 milyard ABŞ dollarından çox məbləğə yüksəlib.

Daha sonra şirkətin pərakəndə investisiya fondları biznesi "Manulife Financial"a satılıb. Hazırda isə Li-Çin "National Commercial Bank Jamaica"nın əsas səhmdarlarından biri olaraq qalır.

Bununla yanaşı, investor borcla investisiya etməyin yüksək risk daşıdığını da vurğulayır.

Onun sözlərinə görə, leverec strategiyası bazar yüksəldiyi zaman gəlirləri artırdığı kimi, qiymətlər aşağı düşdükdə itkiləri də böyüdə bilər. Buna görə də bu üsul yalnız riskləri idarə edə bilən investorlar üçün uyğundur.

Li-Çin hesab edir ki, əksər insanlar üçün ən praktik yanaşma uzunmüddətli investisiyadır.

Onun fikrincə, investisiyaların zamanla mürəkkəb gəlir hesabına böyüməsinə imkan vermək maliyyə uğurunun əsas şərtlərindən biridir. Ayrı-ayrı şirkətləri təhlil etmək imkanı olmayan investorlar üçün isə aşağı xərcli indeks fondları daha uyğun seçim hesab olunur.

Müsahibə zamanı gələcəyin ən perspektivli sahəsi barədə danışan milyarder nüvə energetikasını xüsusi qeyd edib.

O bildirib ki, tarix boyu əsas enerji mənbələrinin dəyişməsi iqtisadi gücün də istiqamətini dəyişib və hazırda dünyanın növbəti böyük transformasiyası nüvə enerjisi istiqamətində baş verir.

Maykl Li-Çin şəxsi həyat hekayəsini də bölüşərək bildirib ki, varlı ailədə böyüməyib. Onun sözlərinə görə, anası o dünyaya gələndə yetim olub və maddi imkanların olmaması səbəbindən hər ikisi övladlığa verilib.

Gənclərə müraciət edən investor maraqlı ifadə işlədib.

O bildirib ki, uğur qazanmaq istəyənlər əvvəlcə "poor, hungry and driven" – yəni yoxsul, ac və məqsədyönlü olmalıdırlar. Onun fikrincə, məhz bu xüsusiyyətlər insanı böyük uğura aparır və gələcəkdə maddi rifahın əsasını qoyur.

Tənzilə Ağabalayeva