İnternet balansı dəyişir: "Cloudflare" Al botlarını standart olaraq bloklayacaq

"Cloudflare" həm axtarış sistemləri üçün indeksləşdirmə aparan, həm də süni intellekt (Al) modellərinin təlimi məqsədilə məlumat toplayan veb-botlarla bağlı yeni siyasətini açıqlayıb. Şirkət bu cür "qarışıq istifadəli" botları standart olaraq bloklayacağını bildirib.

Valyuta.az xəbər verir ki, əvvəllər sayt sahiblərinə seçim kimi təqdim edilən bu qoruma mexanizmi bundan sonra yeni yaradılan internet saytlarında avtomatik aktivləşdiriləcək.

"Cloudflare"ın baş icraçı direktoru Metyu Prins bildirib ki, internet trafikinin böyük hissəsini artıq insanlar deyil, avtomatlaşdırılmış botlar təşkil edir.

Onun sözlərinə görə, yeni sistem sayt sahiblərinə daha çox nəzarət imkanı verəcək və süni intellekt şirkətlərinin məlumatları hansı məqsədlə topladığını daha şəffaf göstərəcək. Yeni qaydalar 2026-cı il sentyabrın 15-dən qüvvəyə minəcək.

Həmin tarixdən etibarən "Cloudflare"a yeni qoşulan müştərilər və mövcud istifadəçilərin yaratdığı yeni internet saytlarında bu siyasət avtomatik tətbiq olunacaq.

Yeni sistem çərçivəsində axtarış sistemlərinin səhifələri indeksləşdirməsinə icazə veriləcək. Lakin reklam yerləşdirilən səhifələrdən süni intellekt modellərinin təlimi və ya AI agentləri üçün məlumat toplayan botlar standart olaraq bloklanacaq.

Sayt sahiblərinə bu funksiyalar üzrə ayrıca seçim imkanı verməyən, yəni həm indeksləşdirmə, həm də süni intellekt məqsədilə fəaliyyət göstərən botlar da eyni qaydada məhdudlaşdırılacaq.

"Cloudflare"ın ödənişsiz istifadəçiləri də sentyabrın 15-dək ayarlarını dəyişmədikləri halda avtomatik olaraq yeni sistemə keçiriləcəklər.

Şirkət 2025-ci ildə təqdim etdiyi "Pay Per Crawl" modelini də yeniləyərək "Pay Per Use" adlandırıb.

Əvvəlki modeldə süni intellekt şirkətləri saytın məzmununu taradıqda ödəniş edirdi. Yeni modeldə isə ödəniş yalnız həmin məzmun süni intellekt çat-botunun cavabında istifadə olunduğu halda tutulacaq.

"Cloudflare" hazırda bu sistem çərçivəsində "Ceramic.AI" və "You.com" ilə əməkdaşlıq etdiyini, gələcəkdə daha çox süni intellekt şirkətinin layihəyə qoşulmasının gözlənildiyini açıqlayıb. Şirkətin açıqlamasında "Google"a da dolayı tənqid yer alıb.

"Cloudflare" hesab edir ki, dünyanın ən böyük axtarış sistemi digər süni intellekt şirkətləri ilə müqayisədə təxminən iki dəfə çox məlumata çıxış əldə edir. Bunun səbəbi "Googlebot"un həm axtarış nəticələri üçün internet səhifələrini indeksləşdirməsi, həm də "Gemini" və "AI Overviews" kimi süni intellekt xidmətləri üçün məlumat toplamasıdır.

Bildirilir ki, "Google" klassik axtarış üçün "Googlebot"dan əlavə, naşirlərə süni intellekt modellərinin təlimi məqsədilə məzmunlarından istifadəyə məhdudiyyət qoymağa imkan verən "Google-Extended" idarəetmə mexanizmini təqdim edib. Lakin naşirlər məzmunlarının "AI Mode" funksiyasında görünməsini istəyib, eyni zamanda süni intellekt modellərinin təlimində istifadə olunmasını istəmədikdə bunu ayrıca tənzimləyə bilmirlər.

"Cloudflare"ın yeni siyasətinin əsas məqsədi "Google" başda olmaqla eyni botdan həm axtarış, həm də süni intellekt məqsədilə istifadə edən şirkətləri sistemlərini yenidən qurmağa təşviq etməkdir.

Paşa Məmmədli