“Netflix” məşhur aktyorun həmtəsisçisi olduğu startapı 587 milyon dollara satın alıb

“Netflix” aktyor və rejissor Ben Afflekin (Ben Affleck) həmtəsisçisi olduğu süni intellekt şirkəti “InterPositive”i 587 milyon dollara satın alıb.

Valyuta.az xəbər verir ki, şirkətin hazırladığı texnologiya film və serial istehsalında xərclərin azaldılmasına və istehsal prosesinin sürətləndirilməsinə imkan verir.

Bundan əvvəl “Netflix”in Ben Afflekin süni intellekt əsaslı film istehsalı şirkəti “InterPositive”i satın aldığı barədə məlumat verilmişdi. Lakin həmin vaxt sövdələşmənin maliyyə detalları ictimaiyyətə açıqlanmamışdı.

Beləliklə, razılaşmanın maliyyə həcmi ilk dəfə rəsmi şəkildə təsdiqlənib. “Bloomberg” daha əvvəl satınalmanın dəyərinin təxminən 600 milyon dollara çata biləcəyini bildirmişdi.

“InterPositive” film və serial istehsalında, xüsusilə post-prodakşn mərhələsində istifadə olunan süni intellekt alətləri hazırlayır. Şirkətin texnologiyası çəkilişlər başa çatdıqdan sonra çatışmayan səhnələrin yaradılması, fonların dəyişdirilməsi və işıqlandırma qüsurlarının aradan qaldırılması kimi prosesləri daha sürətli və daha aşağı xərclə həyata keçirməyə imkan yaradır.

Ben Afflek satınalma elan edilərkən verdiyi açıqlamada bildirib ki, hazırladıqları alətlərin əsas məqsədi insan yaradıcılığının gücünü qorumaqdır.

Onun sözlərinə görə, süni intellekt film yaradıcılarının yaradıcılıq qərarlarını əvəz etmək üçün deyil, istehsal prosesi zamanı yaranan texniki problemlərin həllinə dəstək vermək üçün nəzərdə tutulub.

Satınalma çərçivəsində “InterPositive”in bütün əməkdaşları “Netflix”in komandasına qoşulacaq.

Ben Afflek isə şirkətdə baş məsləhətçi vəzifəsini icra edəcək və süni intellekt dəstəkli məzmun istehsalı texnologiyalarının inkişafına töhfə verəcək.

Mayya Hüseynova