Şakira, Madonna, BTS və Castin Biber Dünya Kubokunun finalından nə qazanıblar?

2026-cı il FIFA Dünya Kubokunun finalında ilk dəfə təşkil olunan fasilə şousunda səhnəyə çıxan dünya ulduzlarının nə qədər qonorar alması ilə bağlı maraqlı detallar açıqlanıb.

Valyuta.az xəbər verir ki, iyulun 19-da keçirilən İspaniya-Argentina finalında Şakira, Madonna, BTS və Castin Biber çıxış ediblər. Bu, Dünya Kuboku tarixində "Super Bowl" formatında təşkil olunan ilk fasilə şousu olub.

Məlumata görə, məşhur ifaçılar bu çıxışa görə ənənəvi qonorar almayıblar. Bildirilir ki, FIFA ABŞ-ın NFL çempionatının finalı olan "Super Bowl"un fasilə şousunda tətbiq edilən modeli seçib. Bu modelə əsasən, təşkilatçılar yalnız səhnə quruluşu, istehsal, texniki təminat və logistika xərclərini qarşılayır, ifaçılara isə ayrıca çıxış haqqı ödənilmir.

Məlumata görə, Şakira, Madonna, BTS və Castin Biber üçün əsas qazanc qlobal tanıtım olub. Dünyada yüz milyonlarla insanın izləyəcəyi şou sənətçilərin musiqilərinin dinlənmə sayını, albom satışlarını, sosial şəbəkələrdəki aktivliyini və digər kommersiya gəlirlərini artırıb.

Bundan əlavə, ifaçılara şouya hazırlıq və məşqlər zamanı simvolik məbləğdə ödəniş edildiyi bildirilir.

Qeyd olunur ki, bu yanaşma yeni deyil. Əvvəlki FIFA Dünya Kuboku mərasimlərində çıxış edən sənətçilər də ənənəvi qonorar almadan səhnəyə çıxmağa razılıq veriblər. Bunun əvəzində onlar turnirin yaratdığı qlobal auditoriya hesabına rəqəmsal platformalarda rekord dinlənmə və izlənmə artımı əldə ediblər.

Belə tədbirlərdən sonra musiqi platformalarında dinlənmə sayının, sosial media izləyicilərinin və kommersiya əməkdaşlıqlarının artması bir dəfəlik qonorarın dəyərini üstələyə bilir.

Sərvanə Rəmixanova