"AliExpress" 629 milyon dollar cərimələndi

Avropa İttifaqı (Aİ) onlayn ticarət platforması "AliExpress"i platformada satılan qanunsuz, təhlükəli və saxta məhsullara qarşı kifayət qədər tədbir görmədiyinə görə 550 milyon avro (təxminən 629 milyon ABŞ dolları) məbləğində cərimələyib.

Valyuta.az xəbər verir ki, bu, Rəqəmsal Xidmətlər Aktı (DSA) çərçivəsində indiyədək tətbiq edilən ən yüksək cərimədir.

Avropa Komissiyasının araşdırmasına görə, şirkət qanunsuz məhsulların yayılması risklərini düzgün qiymətləndirməyib, məhsulların yoxlanılması üçün kifayət qədər resurs ayırmayıb və nəzarət sistemlərinin effektivliyini olduğundan yüksək göstərib. Nəticədə saxta məhsullar, eləcə də təhlükəli oyuncaqlar və kosmetik vasitələr həftələrlə satışda qalıb.

"AliExpress" qərarı qeyri-mütənasib adlandıraraq apellyasiya şikayəti verəcəyini açıqlayıb. Şirkət pozuntuların aradan qaldırılması ilə bağlı tədbirlər planını 20 oktyabr 2026-cı il tarixinədək Avropa Komissiyasına təqdim etməlidir. Əks halda əlavə maliyyə sanksiyaları tətbiq oluna bilər.

Sərvanə Rəmixanova