Dünyanın milyarder musiqiçiləri: Sərvətlərini necə qazanıblar?

Musiqi sənayesi bəzi ulduzları təkcə səhnədə deyil, biznes dünyasında da zirvəyə daşıyıb. Konsertlərdən əldə olunan gəlirlə yanaşı, musiqi kataloqları, şirkətlər, brend əməkdaşlıqları və investisiyalar onların sərvətlərini milyardlarla dollara çatdırıb.

Jay-Z

Təxminən 2,8 milyard dollarlıq sərvəti ilə siyahıya başçılıq edir. Reper sərvətini musiqidən əlavə,” Armand de Brignac” şampanı, “D'Ussé” konyakı, əyləncə şirkəti “Roc Nation”, texnologiya investisiyaları və daşınmaz əmlak layihələri hesabına formalaşdırıb.

Taylor Swift

Sərvəti təxminən 2,1 milyard dollardır. O, bu həddə əsasən rekord qıran “The Eras Tour”, musiqi kataloqu, albom satışları və yayım platformalarından əldə etdiyi gəlirlər sayəsində çatıb.

Bruce Springsteen

Sərvəti təxminən 1,2 milyard dollar qiymətləndirilir. Bunun əsas səbəbi 2021-ci ildə musiqi kataloqunu “Sony Music”ə yüz milyonlarla dollara satması, həmçinin uzun illər davam edən konsert fəaliyyətidir.

Dr. Dre

Təxminən 1 milyard dollarlıq sərvətə malik Dr. Dre isə əsas gəlirini “Beats Electronics” qulaqlıqlarını yaradaraq əldə edib. Şirkət 2014-cü ildə Apple tərəfindən 3 milyard dollara satın alınıb.

Beyoncé Knowles-Carter

Sərvəti də təxminən 1 milyard dollardır. O, musiqi ilə yanaşı dünya turları, moda və saç baxımı brendləri, reklam müqavilələri və digər biznes layihələrindən böyük gəlir əldə edir.

Rihanna

 O, 1 milyard dollarlıq sərvətə sahibdir. Onun sərvətinin əsas hissəsi musiqidən deyil, “Fenty Beauty” kosmetika brendi və “Savage X Fenty” geyim markasından gəlir.

Bu nümunələr göstərir ki, müasir musiqiçilər sərvətlərini təkcə hit mahnılarla deyil, güclü biznes strategiyaları və uğurlu investisiyalarla formalaşdırırlar.

Şəbnəm İbrahimxəlilova