Plastik qablaşdırmalardan imtina: 2 500 ton materiala qənaət edildi

“Logitech” 2026-cı maliyyə ilinə dair "FY26 Impact Highlights Report" (2026-cı maliyyə ili üzrə təsir hesabatının əsas məqamları) sənədini ictimaiyyətə təqdim edib. 

Valyuta.az xəbər verir ki, şirkətin ekoloji hədəfləri istiqamətində əldə etdiyi nəticələri əks etdirən hesabatda emissiyaların azaldılması, materiallardan istifadənin transformasiyası və karbon şəffaflığı sahəsində irəliləyişlər yer alıb. Açıqlanan məlumatlara əsasən, baza illəri ilə müqayisədə Scope 1 və Scope 2 istixana qazı emissiyaları 49 faiz, Scope 3 emissiyaları isə 33 faiz azalıb.

Nəticələri şərh edən “Logitech”in baş icraçı direktoru Hanneke Faber (Hanneke Faber) bildirib ki, şirkət son 20 ildə davamlı inkişafı biznes modelinin mərkəzinə yerləşdirib və bu uzunmüddətli strategiyanın real nəticələrini artıq görür. Onun sözlərinə görə, **“Davamlılıq üçün dizayn”** prinsipi şirkətin dəyərlərindən qlobal təchizat zəncirinədək bütün fəaliyyət istiqamətlərində tətbiq olunur. Faber əlavə edib ki, insanlar və planet üçün doğru hesab edilən addımlar eyni zamanda biznes baxımından da uğurlu nəticələr verir.

Davamlılıq üçün dizayn yanaşması və əsas göstəricilər

Şirkətin davamlı inkişaf strategiyasının əsasını təşkil edən **DfS** (*Design for Sustainability* – Davamlılıq üçün dizayn) yanaşması korporativ mədəniyyətdən məhsulların hazırlanmasına, istehsal proseslərindən təchizatçılar şəbəkəsinə qədər bütün fəaliyyət istiqamətlərini əhatə edir. “Logitech”in əməkdaşlar və davamlı inkişaf üzrə direktoru Elaine Laird (Elaine Laird) bildirib ki, həyat dövrü analizləri vasitəsilə məhsulların ekoloji təsiri qiymətləndirilir, əldə olunan nəticələr isə həm şirkət, həm də sənaye üçün dəyərli məlumatlar təqdim edir. O vurğulayıb ki, şəffaflıq və hesabatlılıq prinsipləri maraqlı tərəflərin etimadının möhkəmlənməsinə xidmət edir.

Hesabatda qeyd olunan əsas göstəricilər bunlardır:

* Emissiyaların azaldılması: Scope 1 və Scope 2 emissiyaları 49 faiz, Scope 3 emissiyaları isə 33 faiz azaldılıb. Həyata keçirilən tədbirlər nəticəsində 200 min tCO₂e-dən çox istixana qazının atmosferə buraxılmasının qarşısı alınıb.
* Karbon şəffaflığı: Hədəf məhsulların 100 faizi üzrə müstəqil üçüncü tərəflər tərəfindən təsdiqlənmiş Məhsulun Karbon İzi (PCF) hesabatları dərc olunub. Bu, istehlakçıların daha məlumatlı seçim etməsinə imkan verir.
* Təkrar emal edilmiş materiallardan istifadə: İstehsal olunan cihazların 81 faizində istehlakdan sonrakı mərhələdə təkrar emal edilmiş plastikdən istifadə olunur.
* Təmir edilə bilən məhsullar və “iFixit” əməkdaşlığı: “iFixit” ilə əməkdaşlıq genişləndirilib, 69 məhsul seriyası üçün ehtiyat hissələri və ətraflı təmir təlimatları təqdim olunub. Dəstəklənən məhsul seriyalarının sayı iki il əvvəlki göstərici ilə müqayisədə üç dəfə artıb.
* Qablaşdırmanın optimallaşdırılması və zərərli maddələrin azaldılması: Plastik blister qablaşdırmalardan imtina və daşınma prosesinin optimallaşdırılması nəticəsində son üç ildə 2 500 ton qablaşdırma materialına qənaət edilib. Bundan əlavə, göndərilən məhsul seriyalarının 55 faizində PVC-dən istifadə tamamilə dayandırılıb.

Beynəlxalq reytinqlərdə ekoloji nailiyyətlər

“Logitech”in ekoloji sahədə əldə etdiyi nəticələr beynəlxalq reytinq təşkilatlarının da diqqətini cəlb edib. Şirkət “TIME” jurnalının hazırladığı "Dünyanın ən davamlı şirkətləri" reytinqində ilk 50 şirkət arasında yer alıb. Bundan əlavə, istehsalçı "Dow Jones Sustainability Europe Index" siyahısına daxil edilib və “Newsweek” tərəfindən "Dünyanın ən yaşıl şirkətləri" sırasında göstərilib.

Paşa Məmmədli