“Rabitəbank” ASC-nin İdarə Heyətinin sədrinin birinci müavini: “Rabitəbankın kredit portfelinin 45 faizi biznes kreditlərindən ibarətdir”

“Rabitəbank”ın əsas strategiyası universal bank modeli üzərində qurulub və məqsəd müştərilərə bütün maliyyə xidmətlərini bir məkanda təqdim etməkdir”.

Valyuta.az xəbər verir ki, bunu “Rabitəbank” ASC-nin İdarə Heyəti Sədrinin birinci müavini Orhan Gültekin bildirib. Onun sözlərinə görə, bank həm fərdi, həm də biznes müştərilərinə xidmət göstərsə də, əsas prioritet biznes kreditlərinin maliyyələşdirilməsidir.

"Strategiyamız biznes kreditlərinin ümumi kredit portfelində 45-50 faiz paya malik olmasıdır. Hazırda kredit portfelimizin 45 faizi biznes kreditlərindən ibarətdir. Bu da təxminən 450 milyon manat təşkil edir", – deyə Orhan Gültekin bildirib.

Orhan Gültekin vurğulayıb ki, bankın maliyyələşdirdiyi layihələrdə əsas üstünlük qeyri-neft sektorunda fəaliyyət göstərən müəssisələrə verilir.

"İstehsal, kənd təsərrüfatı və xidmət sektorunda çalışan şirkətlərin maliyyələşdirilməsinə xüsusi önəm veririk. Eyni zamanda, ölkəyə valyuta gətirən ixracatçı şirkətlər bizim üçün prioritet müştərilər sırasındadır və onların hər zaman yanında olmağa çalışırıq", deyə o bildirib.

İdarə Heyətinin sədrinin birinci müavini əlavə edib ki, biznes müştərilərinin əsas gözləntiləri girov tələbinin az olması, uzunmüddətli və aşağı faizli maliyyələşmənin təmin edilməsidir. Bu baxımdan bank Azərbaycan Biznesinin İnkişafı Fondu, İpoteka və Kredit Zəmanət Fondu, eləcə də Aqrar Kredit və İnkişaf Agentliyi ilə sıx əməkdaşlıq edir. Onun sözlərinə görə, Rabitəbank bu dövlət fondları vasitəsilə maliyyələşmə həyata keçirən ilk üç bank arasında yer alır.

"Bu ilin ilk 6 ayında yalnız dövlət fondları vasitəsilə təxminən 25 milyon manat məbləğində kredit ayırmışıq. Məqsədimiz real sektorun daha da güclənməsinə və sahibkarlığın inkişafına töhfə verməkdir", deyə Orhan Gültekin qeyd edib.