"Azər-Türk Bank" yeni strategiyasında KOB və korporativ biznesi prioritet müəyyənləşdirib

"Azər-Türk Bank" 2026-2028-ci illəri əhatə edən yeni inkişaf strategiyasını təsdiqləyib. Strategiyada korporativ və kiçik-orta biznes (KOB) seqmentinin inkişafı, ölkə iqtisadiyyatının strateji sahələrinin və real sektorun maliyyələşdirilməsində bankın rolunun gücləndirilməsi, rəqəmsal transformasiya və dayanıqlı inkişaf əsas prioritetlər kimi müəyyən edilib.

Valyuta.az xəbər verir ki, bunu "ATB"nin İdarə Heyətinin sədri Günel Nəbiyeva "Report"a müsahibəsində bildirib.

Onun sözlərinə görə, yeni strategiya bankda ciddi transformasiyanın aparılmasını, biznes hədəflərinin dəyişdirilməsini və bu hədəflərə uyğun biznes proseslərinin qurulmasını nəzərdə tutur:

"Bu istiqamətdə artıq konkret transformasiya tədbirlərinin icrasına başlanılıb.

Strategiya çərçivəsində korporativ və KOB müştərilərinə yönəlmiş xidmətlərin keyfiyyətinin yüksəldilməsi, biznes bankçılığında rəqəmsal həllərin genişləndirilməsi və müasir bankçılıq məhsullarının inkişafı istiqamətində işlər görülür".

İdarə Heyətinin sədri qeyd edib ki, bank müştəri təcrübəsinin təkmilləşdirilməsi, daxili proseslərin optimallaşdırılması və qərarvermənin daha səmərəli təşkili məqsədilə süni intellekt texnologiyasının tətbiqi üzərində çalışır:

"Bununla yanaşı, yeni texnoloji həllərin tətbiqində kibertəhlükəsizlik, məlumatların məxfiliyinin təmin olunması və sistemlərin dayanıqlılığının qorunması əsas prioritetlər sırasında yer alır".

G.Nəbiyeva əlavə edib ki, strategiyanın əsas hədəflərindən biri "ATB"ni korporativ müştərilər və sahibkarlar üçün ehtiyacları dərindən anlayan, operativ qərar qəbul edən və uzunmüddətli etibarlı tərəfdaş kimi mövqeyini daha da gücləndirməkdir.