"Nvidia"nın təchizatçısı olan şirkət 700 milyon dollarlıq zavod istifadəyə verib

Tayvanın elektronika istehsalçısı və "Nvidia"nın təchizatçısı olan "Wistron" ABŞ-ın Texas ştatında 700 milyon dollar dəyərində yeni istehsal müəssisəsini istifadəyə verib. Zavod "Nvidia"nın ən son süni intellekt sistemlərinin istehsalı üçün nəzərdə tutulub və ayda on minlərlə hesablama lövhəsi istehsal etmək gücünə malik olacaq.

Valyuta.az xəbər verir ki, Fort-Uort şəhərində yerləşən müəssisədə "Nvidia"nın "GB300 Grace Blackwell Ultra Superchip" prosessoru istehsal olunur. Şirkətin baş icraçı direktoru Censen Huanq bu çip əsasında hazırlanan sistemi "dünyanın ən güclü süni intellekt superkompüteri" kimi qiymətləndirib.

Məlumata görə, ABŞ-da ilk "GB300 Grace Blackwell Ultra Superchip" məhz bu zavodda istehsal edilərək kütləvi istehsala buraxılıb.

Müəssisədə gələcəkdə "Nvidia"nın növbəti nəsil "Vera Rubin Superchip" prosessorlarının da istehsalı həyata keçiriləcək. Zavod bu il istehsal həcmini mərhələli şəkildə artıracaq və aylıq istehsal gücü on minlərlə hesablama lövhəsinə çatacaq.

Müəssisə artıq 500-dən çox yeni iş yeri yaradıb. İlin sonunadək burada çalışanların sayının 1000 nəfərə çatdırılması planlaşdırılır.

Qeyd edək ki, Texasdakı bu zavod "Nvidia"nın 2025-ci ildə ABŞ-da süni intellekt infrastrukturunun inkişafı məqsədilə açıqladığı 500 milyard dollarlıq investisiya proqramının tərkib hissəsidir.

Rəfiqə Abdin