Kibertəhlükəsizlik startapı 180 milyon dollar investisiya cəlb edib

Keçmiş “Meta” və “Snowflake” rəhbərləri tərəfindən təsis edilən kibertəhlükəsizlik startapı “Glow” gizli fəaliyyət mərhələsindən çıxaraq 1,2 milyard dollar dəyərləndirmə ilə unicorn statusu əldə etdiyini açıqlayıb.

Valyuta.az xəbər verir ki, baş ofisi Palo-Altoda yerləşən şirkət A seriyası investisiya raundunda 180 milyon dollar cəlb edib. 

Şirkət hesab edir ki, süni intellektin sürətlə yayılması endpoint təhlükəsizliyinə yanaşmanı dəyişir. Müəssisələr AI alətlərindən daha çox istifadə etdikcə, kibercinayətkarlar da fişinq hücumları, zərərli proqram təminatı və digər kiberhücumlar üçün generativ AI texnologiyalarından yararlanırlar.

2025-ci ildə yaradılan “Glow” müəssisələrə əməkdaş cihazlarında işləyən proqram təminatını, AI agentlərini və proqramçı alətlərini izləməyə imkan verən endpoint təhlükəsizlik platforması hazırlayıb. Şirkətin məlumatına görə, platforma AI agentləri vasitəsilə riskləri real vaxt rejimində qiymətləndirir və təhlükəsizlik siyasətlərinin icrasını təmin edir.

“Glow”un həmtəsisçisi və baş icraçı direktoru Roy Tayger bildirib ki, əvvəlki illərdə əsas diqqət bulud texnologiyalarına yönəlsə də, indi süni intellekt endpoint-lərin əsas hissəsinə çevrilir və bu, təhlükəsizlik sahəsində yeni yanaşma tələb edir.

Şirkət artıq səhiyyə, pərakəndə satış və maliyyə sektorlarında ödənişli müştərilərlə çalışır. Platforma “Amazon Bedrock” vasitəsilə “Anthropic” və “Google Gemini” AI modellərindən istifadə edir. “Glow” bildirir ki, həll artıq zərərli “npm” paketlərini, təhlükəli AI agentlərini və qorunmayan əməkdaş cihazlarını aşkarlayıb.

Hazırda 100-ə yaxın əməkdaşı olan startap “CrowdStrike”, “Microsoft”, “SentinelOne” və “Palo Alto Networks” kimi şirkətlərin fəaliyyət göstərdiyi endpoint təhlükəsizliyi bazarında AI əsaslı preventiv yanaşma ilə rəqabət aparmağı hədəfləyir.

Mayya Hüseynova