Devid Bekhemin startapı 1 milyard investisiya əldə edib

Dünya futbolunun əfsanəsi Devid Bekhemin qida elmləri şirkəti "Prenetics" ilə ortaq şəkildə qurduğu premium qida əlavəsi brendi “IM8 Health”, qlobal sağlamlıq bazarında böyük bir uğura imza atıb. Şirkət, fəaliyyətə başlamasından cəmi 18 ay keçməsinə baxmayaraq, "General Catalyst" investisiya fondundan 1 milyard ABŞ dolları dəyərində böyümə maliyyəsi əldə edib.

​İllik gəlir 200 milyon dolları ötdü

​IM8, qısa müddətdə tarixin ən sürətlə böyüyən qida əlavəsi brendlərindən birinə çevrilib. Hazırda şirkətin illik dövriyyə gəliri 200 milyon dolları keçib və brend dünyanın 43 ölkəsinə məhsul ixrac edir. Gündəlik olaraq təxminən 200 min porsiya qida əlavəsi istehlak olunur.

​Məşhur futbolçu ilə yanaşı, layihəyə idman və media dünyasından Yannis Adetokunbo (NBA çempionu), Arina Sabalenka (tennis üzrə dünya birincisi) və tanınmış motivasiya spikeri Cey Şetti kimi qlobal ulduzlar da həm səfir, həm də şərik kimi qoşulublar.

​Brendi fərqli edən nədir?

​IM8-in elmi heyətində NASA-nın keçmiş baş mütəxəssisləri və dünyaca məşhur "Mayo Clinic" xəstəxanasının həkimləri yer alır. Brendin flaqman məhsulu olan "Daily Ultimate Essentials Pro" adlı toz qarışığı, gündəlik qəbul edilən 16 fərqli vitamin və əlavəni tək bir içkidə birləşdirir. Tərkibində 90-dan çox qida elementi, o cümlədən ürək sağlamlığı üçün CoQ10, oynaqlar üçün MSM və həzm sistemini tənzimləyən pre/pro/postbiotiklər var.

​Devid Bekhem layihə barədə danışarkən bildirib:

​"Sağlamlıq və gümrahlıq həm meydanda, həm də meydandan kənarda mənim üçün həmişə prioritet olub. Biz insanların hər gün özlərini ən yaxşı formada hiss etmələrinə kömək edəcək bir şey yaratmaq istəyirdik və IM8 ilə buna nail olduq. Bu məhsulun mənim şəxsi enerjimə və fokuslanma qabiliyyətimə göstərdiyi müsbət təsiri özüm də hər gün hiss edirəm."

​Gələcək planlar

​Şirkətin verdiyi məlumata görə, IM8 artıq 50 milyondan çox porsiya satış həyata keçirib. Brend yaxın gələcəkdə məhsul çeşidini genişləndirməyi planlaşdırır; 2026-cı ilin son rübündə xüsusi hidrasiya (bədənin su balansını qoruyan) içkilərinin, 2027-ci ilin əvvəlində isə premium vitaminli saqqızların (gummies) təqdim olunması gözlənilir.

Şəbnəm İbrahimxəlilova