Dünyanın ən populyar yüngül təyyarəsinin yeni nəsli təqdim edildi - Üstünlükləri nədir?

Braziliyanın “Embraer” şirkəti təxminən 15 ildir öz sinfində satış lideri olan “Phenom 300” biznes təyyarəsinin yeni versiyasını təqdim edib. 

Valyuta.az xəbər verir ki, bu barədə təyyarə istehsalçısı öz rəsmi saytında məlumat yayıb.

“On ildən artıqdır ki, “Phenom 300” ailəsi bütün yüngül biznes təyyarələrinin qiymətləndirildiyi standartı müəyyənləşdirir. Yeni “Phenom 300EV” ilə biz bu səviyyəni yenidən yüksəldirik”, deyə “Embraer Executive Jets” bölməsinin prezidenti və baş direktoru Maykl Amalfitano bildirib.

“Phenom 300EV” əvvəlki versiyanın maksimal sürətini — təxminən saatda 860 kilometr göstəricisini qoruyub saxlayıb. Bununla yanaşı, mühəndislər uçuş məsafəsini və maksimal faydalı yük imkanını bir qədər artırmağa nail olublar. Yeni model yanacaq doldurmadan 3800 kilometrdən çox məsafə qət edə və 1390 kiloqrama qədər faydalı yük daşıya bilir.

Əsas yeniliklərdən biri xüsusi olaraq “Embraer” üçün hazırlanmış “Garmin G3000 Prodigy Touch” avionika kompleksidir. Sistemə bir sıra yeni funksiyalar, o cümlədən avtomatik təcili eniş texnologiyası olan “Emergency Autoland” əlavə edilib.

Pilot təyyarəni idarə edə bilmədiyi halda sistem idarəetməni avtomatik üzərinə götürür, uyğun aerodrom seçir və təyyarəni təhlükəsiz şəkildə yerə endirir.

“Embraer” şirkətinin məlumatına görə, “Phenom 300EV” öz sinfində bu komplekslə təchiz olunan ən böyük biznes təyyarəsi olacaq. Bundan əlavə, model təhlükəsizliyi artıran və qalxma-enmə proseslərini daha rahat edən avtomatik əyləcləmə sistemi “Autobrake” ilə təchiz edilib.

Şirkət həmçinin yeni çoxfunksiyalı elektron idarəetmə qurğusu “Multi-Purpose Electronic Controller” (MEC) quraşdıracaq. Bu sistem sükanın elektron idarə olunmasını (“rudder-by-wire”) və digər elektron idarə olunan təyyarə avadanlıqlarını birləşdirir. Bu isə pilotun iş yükünü azaltmağa və texniki xidmət prosesini sadələşdirməyə imkan verir.

“Phenom 300EV” salonunun əsas xüsusiyyətləri əvvəlki “300E” modeli ilə demək olar ki, eynidir. Təyyarədə böyük pəncərələr və qabaqcıl kabin hermetikləşdirmə sistemi saxlanılıb. Bununla belə, salonda bir sıra təkmilləşdirmələr aparılıb, o cümlədən bar hissəsi yenilənib və temperaturun tənzimlənməsi yaxşılaşdırılıb.

“Phenom 300” “Embraer” tərəfindən hazırlanmış yüngül reaktiv biznes təyyarəsidir. O, 6–10 sərnişin daşıya bilir və təxminən 3650 kilometr məsafə qət etmək imkanına malikdir. Təyyarənin ekipajı 1 və ya 2 pilota qədər təşkil olunur.

Adətən “Phenom 300” VIP daşımalar, korporativ uçuşlar və şəxsi səfərlər üçün istifadə edilir. Hazırda bu modeldən təxminən 940 ədəd istehsal olunub.

“Phenom 300” modelinin populyarlığı onun öz sinfində yüksək sürət, uzun uçuş məsafəsi və aşağı istismar xərcləri kimi üstün xüsusiyyətlərin birləşməsi ilə əlaqələndirilir. Təyyarənin digər üstünlükləri böyük baqaj bölməsi və aşağı səs səviyyəsidir.

Paşa Məmmədli