“Xalq Bank”ın mənfəəti azalsa da, faiz gəlirləri 1,3 milyon manat artıb

“Xalq Bank” 2026-cı ilin ikinci rübünü 13 milyon 489 min manat xalis mənfəətlə başa vurub.  

 Valyuta.az xəbər verir ki, bu göstərici 2025-ci ilin ikinci rübündə qeydə alınmış 26 milyon 622 min manat xalis mənfəətlə müqayisədə 49,29% və ya 13 milyon 133 min manat azalıb. 

Maliyyə hesabatına əsasən, faiz gəlirləri 2025-ci ilin ikinci rübündəki 101 milyon 601 min manatdan 2026-cı ilin eyni dövründə 102 milyon 919 min manata yüksəlib. Beləliklə, faiz gəlirləri 1,29% və ya 1 milyon 318 min manat artıb. 

Faiz gəlirlərinin əsas hissəsini müştərilərə verilmiş kreditlər üzrə əldə olunan 78 milyon 013 min manatlıq gəlir təşkil edib. 

Hesabat dövründə faiz xərcləri 2025-ci ilin ikinci rübündəki 34 milyon 951 min manatdan 39 milyon 778 min manata yüksəlib. Bu göstərici 13,81% və ya 4 milyon 827 min manat artıb.

Qeyri-faiz gəlirləri isə azalıb. Bu göstərici 2025-ci ilin ikinci rübündəki 26 milyon 414 min manatdan 18 milyon 141 min manata düşərək 31,32% və ya 8 milyon 273 min manat azalıb. 

Eyni zamanda, qeyri-faiz xərcləri 49 milyon 959 min manatdan 59 milyon 949 min manata qalxıb. 2026-cı ilin ikinci rübünün sonuna “Xalq Bank”ın aktivləri 2 milyard 832 milyon 273 min manat təşkil edib. Bu, 2025-ci ilin eyni dövründə qeydə alınmış 3 milyard 440 milyon 521 min manat göstəricisi ilə müqayisədə 17,67% və ya 2 milyard 488 milyon manat azdır. 

Hesabat dövrünün sonunda bankın öhdəlikləri 2 milyard 308 milyon 693 min manat olub. Bu göstərici 2025-ci ilin ikinci rübündəki 2 milyard 906 milyon 473 min manatla müqayisədə 20,56% və ya 597 milyon 779 min manat azalıb.

Şəbnəm İbrahimxəlilova