"Uber" "Glovo"nun sahibini 13 milyard avroya satın alır

ABŞ-ın "Uber Technologies" şirkəti "Glovo" çatdırılma xidmətinin sahibi olan Almaniyanın "Delivery Hero" şirkətini 13 milyard avroya almaq barədə razılığa gəlib. 

Valyuta.az xəbər verir ki, bu barədə şirkətin yaydığı rəsmi məlumatda bildirilir.

Razılaşmanın şərtlərinə əsasən, "Uber" "Delivery Hero"nun səhmdarlarına hər səhm üçün 41,5 avro təklif edəcək. Bu, şirkətin ümumi dəyərinin 13 milyard avro qiymətləndirilməsi deməkdir. Sövdələşmənin 2027-ci ilin ikinci yarısında tamamlanacağı gözlənilir. Bundan sonra birləşdirilmiş platforma dünyanın 99 ölkəsində fəaliyyət göstərəcək.

Şirkətin açıqlamasına görə, bu addım "Uber"in qlobal texnologiya platforması və mobillik şəbəkəsini "Delivery Hero"nun yerli brendləri, tərəfdaş şəbəkəsi və sürətli məhsul çatdırılması xidməti ilə birləşdirəcək.

"Uber"in baş icraçı direktoru Dara Xosrovşahinin sözlərinə görə, platformaların birləşdirilməsi dünyanın ən dinamik iqtisadiyyatlarında milyonlarla insan üçün çatdırılma xidmətlərini daha əlçatan və etibarlı edəcək, eyni zamanda satıcılar və kuryerlər üçün yeni imkanlar yaradacaq.

Bununla yanaşı, "Delivery Hero" bildirib ki, sövdələşmə yekunlaşana qədər hər iki şirkət müstəqil fəaliyyətini davam etdirəcək. Alqı-satqının 2027-ci ilin ikinci yarısında bütün zəruri icazələrin alınması və digər şərtlərin yerinə yetirilməsindən sonra başa çatdırılması planlaşdırılır.

Razılaşma çərçivəsində "Uber" həmçinin "Delivery Hero"nun Berlindəki baş qərargahını qorumağı, ən azı 2029-cu ilə qədər işçi ixtisarları etməməyi və qarşıdakı beş il ərzində Almaniyaya 2 milyard avro investisiya yatırmağı öhdəsinə götürüb.

Paşa Məmmədli