2,5 milyona hazır ferma kompleksi satışa çıxarıldı

Xızı rayonunda yerləşən ferma və əkinçilik üçün tam hazır kompleks satışa çıxarılıb.

Valyuta.az xəbər verir ki, Bakı-Quba yolunun 44-cü kilometrində, Yaşma qəsəbəsində yerləşən kompleksin satış qiyməti 2 milyon 500 min manat təşkil edir.

Elanda qeyd olunub ki, kompleks 50 hektar torpaq sahəsini əhatə edir. Ərazi heyvandarlıq, buğda və yonca əkini üçün yararlı hesab olunur. Kompleksdə 2 800 kvadratmetr tikili sahəsi mövcuddur.

İnfrastruktur baxımından əraziyə Şollar su xətti çəkilib. Bundan başqa, suvarma sistemi (kanal, hidrofor və motor) qurulub, həmçinin kompleksin asfalt yola birbaşa çıxışı var.

Elana əsasən, ərazidə heyvandarlıq üçün tövlələr və yardımçı tikililər, eləcə də ferma heyəti üçün yaşayış və inzibati binalar yerləşir.

Sənədləşmə hissəsində isə kompleks üzrə çıxarış (kupça), mülkiyyət sənədləri və torpaq üzrə daimi istifadə hüququnun olduğu qeyd edilib.

Sərvanə Rəmixanova