"Microsoft" satış komandalarını "OpenAI" və "Anthropic"ə qarşı hazırlayır

"Microsoft" süni intellekt bazarında rəqabəti gücləndirmək məqsədilə satış komandaları üçün yeni təlimlər keçirməyə başlayıb.

Valyuta.az xəbər verir ki, şirkət korporativ müştərilərə "Copilot" platformasını "OpenAI" və "Anthropic" həllərindən üstün təqdim etmək üçün satış nümayəndələrini xüsusi şəkildə hazırlayır.

Məlumata görə, təlimlərdə "Copilot"ın təkcə çatbot deyil, Microsoft 365, Azure və şirkətin təhlükəsizlik həlləri ilə inteqrasiya olunmuş süni intellekt platforması olduğu vurğulanır. Satış komandalarına həmçinin "Microsoft"un hazırladığı süni intellekt modellərinin daha aşağı xərc, korporativ sistemlərlə daha güclü inteqrasiya və məlumat təhlükəsizliyi baxımından üstünlükləri izah edilir.

Bildirilir ki, şirkət "OpenAI" və "Anthropic" həllərinin güclü tərəflərini qəbul etsə də, "Copilot"ın ümumi istifadə xərcləri, "Microsoft" ekosistemi ilə inteqrasiya imkanları və korporativ idarəetmə baxımından daha əlverişli olduğunu ön plana çıxarmağı hədəfləyir.

Bu addım "Microsoft"un son dövrlərdə "OpenAI"dan asılılığını azaltmaq istiqamətində atdığı addımların davamı kimi qiymətləndirilir. Şirkət artıq "Copilot"ın bəzi funksiyalarında özünün hazırladığı süni intellekt modellərindən daha geniş istifadə etməyə başlayıb.

Sərvanə Rəmixanova