"Google Play" alternativ tətbiq mağazalarının yüklənməsinə icazə verəcək

"Google Android" ekosistemində mühüm dəyişiklik edib.

Valyuta.az xəbər verir ki, şirkət iyulun 22-dən etibarən ABŞ-dəki Android istifadəçilərinə "Google Play Store" vasitəsilə üçüncü tərəf tətbiq mağazalarını yükləməyə icazə verəcək.

Bu qərar "Fortnite" oyununun yaradıcısı "Epic Games" tərəfindən 2020-ci ildə "Google"a qarşı qaldırılmış antiinhisar (antitrust) iddiasından sonra qəbul edilib. "Epic Games" iddia edirdi ki, "Google Play Store"un siyasəti alternativ tətbiq mağazaları və ödəniş sistemlərinin istifadəsini çətinləşdirir.

ABŞ məhkəməsi 2023-cü ildə "Epic Games"in xeyrinə qərar çıxarıb və Google-dan rəqib tətbiq mağazalarının fəaliyyətinə daha geniş imkan yaratmağı tələb edib. Tərəflər sonradan qərarın icrası ilə bağlı razılığa gəlməyə çalışsalar da, bu mümkün olmayıb. Nəticədə "Google" məhkəmə qərarını icra etməyə başlayıb.

Şirkətin istifadəyə verdiyi "Play Catalog Access Program" çərçivəsində üçüncü tərəf tətbiq mağazaları artıq birbaşa "Google Play" üzərindən istifadəçilərə təqdim ediləcək.

Yeni qaydalar tətbiq hazırlayanlar üçün də dəyişikliklər nəzərdə tutur. Belə ki, onlar alternativ ödəniş üsullarından istifadə edə, həmçinin istifadəçiləri öz internet saytlarındakı alış seçimlərinə yönləndirə biləcəklər.

"Google" bununla yanaşı, tətbiqdaxili alışlardan tutduğu komissiya faizini 30%-dən 10%-ə endirib.

Şirkət bildirib ki, edilən dəyişikliklər "Android" ekosistemində seçim imkanlarını və rəqabəti artıracaq. Bununla yanaşı, "Google Android"in təhlükəsizlik standartlarını qorumağa və tətbiq hazırlayanlar üçün rəqabətli mühit yaratmağa davam edəcəyini vurğulayıb.

Qeyd edək ki, yeni qaydalar hələlik yalnız ABŞ-dəki "Android" istifadəçilərinə şamil olunur.