Süni intellektin ən çox təsir edəcəyi deyilən peşələr gözlənildiyi kimi azalmır - Araşdırma

Süni intellektin (AI) ən çox təsir edəcəyi hesab olunan ağ yaxalı peşələr gözlənilənin əksinə olaraq böyüməyə davam edir. Yeni araşdırma göstərir ki, ən sürətli azalma isə əvvəllər yüksək riskli hesab edilməyən inzibati və ofis işlərində müşahidə olunur.

Valyuta.az xəbər verir ki, indiyədək aparılan bir çox qiymətləndirmələrdə menecerlər, maliyyə analitikləri və hüquqşünaslar kimi peşələr AI üçün ən riskli kateqoriyada göstərilirdi. Lakin Levanonun araşdırması fərqli mənzərə ortaya qoyub.

Tədqiqata əsasən, idarəetmə, mühəndislik, elm və hüquq sahələrində çalışanların sayı artmaqda davam edir, bəzi peşələrdə isə artım tempi daha da sürətlənib.

Əvəzində, əvvəllər AI riskinin nisbətən aşağı olduğu hesab edilən sənəd dövriyyəsi üzrə əməkdaşlar, mühasibat köməkçiləri və müştəri xidmətləri işçilərinin sayı sürətlə azalır.

Levanon bu azalmanın yalnız həmin peşələrin zəifləyən sahələrdə fəaliyyət göstərməsi ilə bağlı olmadığını müəyyən etmək üçün əlavə təhlil aparıb. O, hər peşənin artım və ya azalma tempini fəaliyyət göstərdiyi sektorların orta göstəriciləri ilə müqayisə edib.

Nəticələr göstərib ki, inzibati və ofis işlərinin azalması sektorların zəifləməsi ilə deyil, məhz həmin peşələrin özündə baş verən dəyişikliklərlə əlaqədardır. Maraqlıdır ki, bu azalma idarəetmə və rəhbər vəzifələrin genişləndiyi sahələrdə də müşahidə olunur.

"Harbor Global" şirkətinin süni intellekt strategiyası üzrə qlobal rəhbəri Rudy DeFelice bildirib ki, AI peşələrin bütün məsuliyyətini deyil, yalnız müəyyən tapşırıqlarını avtomatlaşdırır.

"Peşəkarların yerinə yetirdiyi tapşırıqlarla həmin tapşırıqlara görə daşıdıqları məsuliyyət arasında fərq var. Hazırda süni intellekt işlərin müəyyən hissəsini avtomatlaşdırır, lakin bu vəzifələrlə bağlı məsuliyyəti öz üzərinə götürə bilmir", – deyə o qeyd edib.

Sərvanə Rəmixanova