Şirkətin strategiyasını rəhbər yazmalı, işçilər reallaşdırmalıdır?

Şirkətlərdə inkişaf strategiyasının hazırlanması təkbaşına uğur üçün kifayət etmir. Bəzən düzgün strategiya olsa da, onun icrası ləngiyir və ya əməkdaşlar bu strategiyanı tam anlamır. Nəticədə planlar kağız üzərində qalır, gözlənilən nəticələr isə əldə olunmur. Belə vəziyyətdə şirkətlər hansı addımları atmalıdır?

Hazırlanmış strategiyanın bütün işçilər tərəfindən mənimsənilməsi və effektiv şəkildə tətbiq edilməsi üçün rəhbərlik hansı üsullardan istifadə etməlidir?

Biznes konsultant İlham Əfəndiyev Valyuta.az-a bildirib ki, İnkişaf strategiyasının hazırlanması təkcə rəhbərliyin hazırladığı sənəd deyil:

“Effektiv strategiyanın əsasında peşəkar şəkildə təşkil olunmuş strateji sessiya dayanır. Bu sessiyada şirkətin mövcud vəziyyəti, bazardakı dəyişikliklər, komandanın potensialı, korporativ mədəniyyəti və şirkətin ümumi ab-havası obyektiv şəkildə qiymətləndirilməlidir. Ən uğurlu strategiyalar rəhbərlik tərəfindən təkbaşına yazılan deyil, əsas rəhbərlərin və vacib əməkdaşların iştirakı ilə formalaşdırılan strategiyalardır. Bu yanaşma həm daha düzgün qərarlar qəbul etməyə, həm də gələcəkdə strategiyanın əməkdaşlar tərəfindən daha asan qəbul edilməsinə şərait yaradır".

İ.Əfəndiyev deyir ki, strategiya müəyyən edildikdən sonra əsas mərhələ onun təşkilat daxilində düzgün tətbiq olunmasıdır: "Bunun üçün strateji məqsədlər bütün əməkdaşlara sadə və anlaşılan şəkildə izah edilməli, hər şöbə və hər bir əməkdaşın bu strategiyadakı rolu dəqiq müəyyənləşdirilməlidir. Eyni zamanda, rəhbərlər strategiyanın əsas daşıyıcıları kimi çıxış etməli, əməkdaşların yeni hədəflərə uyğun bilik və bacarıqlarının inkişafı üçün mütəmadi təlimlər təşkil olunmalıdır. Strategiyanın icrası isə konkret performans göstəriciləri (KPI) əsasında davamlı izlənilməli və zərurət yarandıqda prosesə müvafiq düzəlişlər edilməlidir”.

“Yadda saxlamaq lazımdır ki, strategiyanın uğuru onun nə qədər gözəl yazılmasından deyil, nə dərəcədə əməkdaşlar tərəfindən mənimsənilməsindən və gündəlik fəaliyyətə çevrilməsindən asılıdır” – deyə biznes konsultant qeyd edib.

Şəbnəm İbrahimxəlilova