"Goldman Sachs": Brent markalı neftin qiyməti 120 dolları keçə bilər

"Goldman Sachs" investisiya bankının analitikləri xəbərdarlıq ediblər ki, Hörmüz boğazında gəmiçilik problemləri davam edərsə, dördüncü rübdə Brent markalı neftin qiyməti bir barel üçün 120 dolları keçə bilər. 

Valyuta.az xəbər verir ki, bu barədə "Bloomberg" məlumat yayıb.

"Goldman Sachs"ın hesabatına əsasən, gərginliyin artması və Fars körfəzindən neft axınının münaqişə başlamazdan əvvəlki göstəricilərin 45 faizindən aşağı səviyyəyə düşməsi artıq qiymətlərin yüksəlməsinə səbəb olub.

Bununla belə, bank qeyd edir ki, hazırda bu ssenari əsas proqnoz hesab edilmir.

"Bloomberg"in sitat gətirdiyi "Goldman Sachs"ın baza proqnozuna görə, Yaxın Şərqdə münaqişənin gərginliyi azaldığı təqdirdə Brent markalı neftin qiyməti sabitləşməlidir.

Bank gözləyir ki, cari ilin dördüncü rübündə bir barel neftin orta qiyməti 80 dollar, gələn il isə 75 dollar təşkil edəcək.

Lakin analitiklər xəbərdarlıq edirlər ki, bu proqnoz üzrə risklər qiymət artımı istiqamətində dəyişib. Buna səbəb Hörmüz boğazında davam edən gəmiçilik problemləri və Qırmızı dənizdə yeni pozuntuların baş vermə ehtimalıdır.

Paşa Məmmədli