İki tələbənin sadə ideyası bu gün 1 milyondan çox istifadəçisi olan platformaya çevrildi

ABŞ-da dörd universitet tələbəsinin sadə bir gündəlik problemi həll etmək istəyi qısa müddətdə geniş auditoriyaya çatan startapın yaranmasına səbəb olub.

Valyuta.az xəbər verir ki, Miçiqan Universitetinin tələbələri tərəfindən yaradılan "MeetYourClass" platforması universitetə yeni qəbul olunan gənclərə kampusa gəlməzdən əvvəl gələcək qrup və otaq yoldaşları ilə tanış olmağa imkan yaradır.

Layihənin əsası 2022-ci ildə Miçiqan Universitetinə qəbul olunan Bleyk Mişli (Blake Mischley) və Cona Liss (Jonah Liss) tərəfindən qoyulub. Onlar müşahidə ediblər ki, yeni tələbələr universitetə başlamazdan əvvəl bir-birlərini tapmaq üçün əsasən Instagram səhifələri və qeyri-rəsmi sosial media qruplarından istifadə edirlər. Bu proses isə həm vaxt aparır, həm də etibarlı olmur.

Bu problemin həlli üçün onlar tələbələri eyni platformada birləşdirən "MeetYourClass" tətbiqini hazırlayıblar. Daha sonra komandaya Kaleb Şmottlax (Kaleb Schmottlach) və Con Millar (Jon Millar) qoşulub və layihə dörd həmtəsisçi tərəfindən inkişaf etdirilərək tam funksional startapa çevrilib.

Platforma istifadəçilərə qəbul olunduqları universitet üzrə digər tələbələrlə tanış olmağa, ortaq maraqları olan insanları tapmağa, potensial otaq yoldaşı seçməyə və universitet icmasına qoşulmağa imkan verir. Məqsəd tələbələrin yeni mühitə uyğunlaşmasını asanlaşdırmaq və onların ilk gündən sosial çevrə formalaşdırmasına kömək etməkdir.

Startap qısa müddətdə böyük auditoriya toplayıb. "MeetYourClass"ın rəsmi məlumatına görə, hazırda platformadan 1 009 783-dən çox istifadəçi yararlanır. Xidmət ABŞ üzrə 1 100-dən çox universiteti əhatə edir.

Şirkətin paylaşdığı statistikaya əsasən, platformada tam profil yaradan hər bir tələbə orta hesabla 51 yeni tələbə ilə əlaqə qurur. Bundan əlavə, "MeetYourClass"ın idarə etdiyi universitet icmaları qəbul mövsümündə sosial şəbəkələr vasitəsilə 59 milyon nəfərdən çox auditoriyaya çatıb.

"Forbes" nəşrinin məlumatına görə, platforma qısa müddətdə ABŞ universitetləri arasında geniş yayılaraq tələbələrin universitet həyatına uyğunlaşmasını asanlaşdıran rəqəmsal həllərdən birinə çevrilib.

Mayya Hüseynova